Politikonan ta privilegiá un kategoria di ámtenar i demotivá otronan
- ta ámtenar privilegiá so tin benefisio di e privilegio? -

Nos polítikonan ta privilegiá un grupo chikitu di ámtenar ku nan ta konsiderá nan hendenan di konfiansa. Esaki ta demotivá un grupo grandi di otro ámtenar i hopi bia ta kousa malkontentu den e kuerpo di ámtenar ku por resultá den un aparato públiko ku no ta funshoná manera debe ser; manera komunidat tin derechi ariba.
Kontrolaria General di Antia Hulandes (ARNA) a bisa den su “Rapport bevattende uitkomsten van het onderzoek indienstneming en salarisbetaling personeel eilandgebied Curacao – 21 juni 2007” ku Bestuurscollege ta nombra nan kolaboradónan i sekretarianan den servisio di gobièrnu sin tene kuenta ku proseduranan vigente i sin konsultá ku e hefe di servisio. Mayoria bia tambe e personanan aki no ta kumpli ku e eksigensianan di e funshon ku nan ta wòrdu nombrá aden. Un ehèmpel resien di un tipo di nombramentu asina ta esun ku a tuma lugá na DROV ku na e momento aki ta den korte pasobra e nombramentu aki a perhudiká un empleado di DROV den su karera. ARNA ta di opinion ku e tipo di nombramentunan aki ta frustrante pa hefenan i personal di servisionan.

ARNA a investigá tambe dunamentu di e kompensashon ex. artíkulo 10 di BRC 1998 na entre otro kolaboradónan i sekretarianan di diputadonan (Rapport inzake onderzoek toelagen ex artikel 10 BRC 1998 en artikel 26 LMA – 22 november 2007). ARNA a konstatá ku e kolaboradónan i sekretarianan ta risibí e kompensashon outomátikamente i ku no tin otro eksigensianan ku nan tin ku kumpli kuné. Tambe ARNA a konstatá ku e kompensashon ta keda outomátikamente (por parti) inkorporá den e salario ora e empleado bai traha (bek) na e servisio kaminda e a keda nombrá. Dor di esaki un grupo chikitu di ámtenarnan ta keda privilegiá riba hopi otronan.
E konklushonnan prinsipal di ARNA ta ku e manera ku ta duna e kompensashon ta kontra e meta i puntonan di salida di e BRC 1998. Komo konsekuensha di esaki por papia di algu ku ta saliendo fo’i man, ku ta arbitrario i ku falta transparensha. Un otro konklushon prinsipal ta ku, e kompensashon ku ta ser duná no ta kuadra ku regla ni ku lei. ARNA ta rekomendá entre otro pa revisá e reglamentashon pa kolaboradornan i sekretarianan ku ta ser poné na disposishon di Bestuurscollege.
Ta basta awor! Nos polítikonan mester kuminsá sigui e rekomendashonnan di ARNA i stòp di perhudiká e aparato públiko. Empleado públiko ta sirbi komunidat i no partidonan polítiko!

Ta ámtenar so tin benefisio di e kompensashon ku e ta risibí ora e ta na disposishon di un diputado? Kiko tin di bèrdat ku tin partidonan polítiko ku ta eksigí di nan kolaboradónan i sekretarianan pa nan duna partido un parti di nan kompensashon? Si esaki ta bèrdat nos por papia di un situashon indeseabel. Naturalmente kada empleado públiko mester sa kiko e ta hasi ku su kompensashon pero ora un partido polítiko ta tene kuenta ku e ta risibí un parti di e kompensashon di su kolaboradónan i sekretarianan kaminda ta polítikonan mes ta aprobá e maneho di kompensashon (inkluso posibel futuro oumento) nos por papia di un situashon di konflikto di interes. E fenómeno aki mester keda investigá i bira transparente. Nos por bisa libramente ku komunidat ta supsidiando partidonan polítiko. Esaki ta nos intenshon? Lo ta interesante pa sa kuantu sèn kada partido ta risibí di e manera aki anualmente. Ki dia e lei ku ta regulá transparensha di fondonan di partidonan polítiko ta drenta na vigor? By the way; si ámtenarnan di konfiansa mester kontribuí ku partido finansieramente, mandatarionan (diputadonan i miembronan di Konseho Insular) tambe tin ku hasi esaki ku por ehèmpel parti di nan salario?

Si komunidat akseptá ku ta sigui supsidiá partidonan polítiko ku sèn di pueblo, e tin mag di eksigí di nos partidonan polítiko ku nan ta ofresé mandatarionan kapasitá pa sirbi komunidat i ku e sèn ku nan ta risibí for di parti di e kompensashon ex artíkulo BCR 1998 ta wòrdu usá pa formashon di mandatarionan?


Etienne van der Horst
28 Novèmber 2007