A tuma akshon pa investigá posibel mal uso di creditcard di Gobièrnu dor di un eks-diputado?

Dia 7 di novèmber 2007 un matutino a informá ku un eks-diputado a hasi mal uso di un credit card di Gobièrnu pa metanan personal i nunka no a paga bek.
For di un promé análisis di e informashon ku e matutino a publiká tin indikashon ku por ta trata di un fundashon òf kompania anónimo di Gobièrnu. Un detaye importante ta ku e artíkulo a informá ku e aktonan di un eks-diputado a kousa hopi konflikto den pasado lagando vários persona kapasitá bandoná e servisio di e organisashon. Si bai bek den tempu nos por mira ku na òktober/novèmber 2006 medionan di komunikashon a publiká ku 2 persona kapasitá a bandoná servisio di CTB pa motibu di konflikto ku e diputado di e tempu ei. No ta ekskluí ku tin un òf mas otro fundashon òf kompania anónimo di gobièrnu kaminda tambe tabata tin personanan kapasitá ku a bandoná servisio di e organisashon pa motibu di konflikto ku e diputado ku tabata responsabel pa e organisashon pero un promé análisis no profundo ta indiká ku den e kaso aki por ta trata di CTB. Mester bini klaridat pa komunidat ta kua entidat e matutino ta referí na dje.

Komunidat no a tende nada mas despues ku e artíkulo a sali den e matutino. Komo ku ta trata di un entidat di gobièrnu lo ta bon pa Bestuurscollege laga investigá ku en bèrdat ta trata aki di CTB òf ku ta trata di un otro organisashon di gobièrnu. Den pasado tabata tin problema kaba ku mal uso di creditcard na CTB dor di un diputado pa despues SOAB a formulá instrukshonnan hopi kla pa uso di creditcard. E tempu ei e mal uso di e creditcard tabata kousa di masha konmoshon den mundu polítiko i hopi publisidat rondó di e suseso na CTB. Di kon awor aki komunidat no ta tende nada? Tres siman a pasa despues ku e informashon a keda publiká i komunidat no a tende nada mas. Si e informashon ku a sali den e matutino ta robes komunidat tin derecho pa tende esaki i si e eks-diputado entretantu, awor ku a publiká informashon over di e mal uso, a paga tur e sèn bek tambe komunidat tin derecho di tende esaki. Ta trata di sèn di komunidat. Mester kita tur duda ku fondonan di komunidat ta keda mal usa no pa e meta ku nan ta destiná p’e. Na unda e sistemanan di kòntròl ta keda den organisashonnan di gobièrnu? Di kon ta awor numa, probablemente despues di 1 aña, ta denunsia e posibel mal uso di creditcard? No tin un kòntròl interno. Un akountent no ta kontrolá bukinan? Direktivanan/komisarionan ta kargando asumiendo nan responsabilidat pa e fondonan di nan organisashon na un manera korekto? Bestuurscollege ta asumí su responsabilidat? No por permití ku tin mal uso di e fondonan di entidatnan di gobièrnu pa metanan personal. Tin vários manera di kontrolá (mal)uso di fondonan.

Esnan ku ta sinti nan mes responsabel por fabor aktua awor! Duna komunidat un señal ku su mandatarionan, tantu di oposishon komo di koalishon, ta duna good governance e balor ku e meresé.


Etienne van der Horst
28 Novèmber 2007