Pa kiko Bestuurscollege no ta presentá e desishon di nombramentu di sr. Schotte?

E siman aki e kaso di un empleado di DROV kontra Gobièrnu Insular relashoná ku nombramentu di sr. Schotte na DROV a presentá den korte. E empleado su abogado a bisa ku su kliente a keda perhudiká personalmente den su karera dor di e desishon di e Bestuurscollege anterior nombrando sr. Schotte komo hefe di e departamentu di “Facilitaire Zaken” na DROV. Durante e kaso e abogado di Gobièrnu Insular a bisa ku no tin desishon riba nombramentu di sr. Schotte na DROV. Esaki a asombrá tur partido den korte. Den resien pasado diputado Willem a yega di bisa ku 3 konseho hurídiko a bisa ku no por revoká e desishon di nombramentu di sr. Schotte, despues e a bisa ku tin motibu pa revoká e desishon pa finalmente e a bisa pa bai korte numa. Esaki ta nifiká ku tin un desishon di nombramentu. Tambe Bestuurscollege a informá empleadonan di DROV por eskrito, despues ku nan a protestá kontra e nombramentu di sr. Schotte den DROV, ku Bestuurscollege tin komprenshon pa e ponensianan di e empleadonan pero no ta mira motibu pa bini bek riba e desishon di nombramentu. Ta kon por ta posibel ku e abogado di Gobièrnu Insular ta bisa ku no tin desishon di nombramentu di sr. Schotte na DROV. Por ta posibel ku ta ke no ke pa e desishon ei bini riba mesa pa kisas asina un i tur por mira ku e desishon tumá no ta basá riba ningun konseho, ni di PZCB, ni di AJZ i ni di Hefe di DROV, i sin motivashon?

Den su rapòrt “Indienstneming en salarisbetaling personeel eilandgebied Curacao - juni 2007” Kontrolaria General ta konstatá ku den kaso di tumamentu den servisio di kolaboradónan i sekretarianan di diputadonan Bestuurscollege no a sigui proseduranan vigente i mayoria bia e personanan ku ta keda tumá den servisio no ta kumpli ku e eksigensianan di e funshonnan ku nan ta keda nombra aden.
E prosedura pa tuma hende den servisio ta bisa ku Bestuurscollege por desviá for di e prosedura pero Kontrolaria General a konstatá ku den ningun di e kasonan ku Bestuurscollege a desviá for di prosedura durante e periodo 2003 te ku 2006 Bestuurscollege a motivá esaki sufisientemente lokual ta un eksigensia di bon gobernashon.
Kontrolaria General ta bisa ku den kuadro di bon gobernashon Bestuurscollege mester duna un bon ehèmpel i sigui su mes proseduranan. Si Bestuurscollege ta di opinion ku mester desviá for di e proseduranan vigente bon gobernashon ta eksigí ku Bestuurscollege ta hasi esaki na un manera transparente lokual segun Kontrolaria General no tabata e kaso durante e periodo 2003 te ku 2006.
E lokual Kontrolaria General a konstatá tokante e nombramentunan durante e periodo 2003 te ku 2006 ta konta pa e nombramentu di sr. Schotte tambe? Ta pa e motibu ei no ke presentá e desishon? Ta bon pa e Bestuurscollege aktual aktua transparente i no krea e impreshon ku ke tapa pa e maneho di e Bestuurscollege anterior pasobra esei ta e impreshon ku ta kreando ora abogado di Gobièrnu Insular bisa den korte ku no tin desishon riba nombramentu di sr. Schotte na DROV.

E manera ku Bestuurscollege ta atendé ku e nombramentu di sr. Schotte no ta duna e siudadano e konfiansa ku algu lo sali for di e investigashon ku e komishon bou di presidensia di SOAB ta hasiendo na e momentu aki tokante e nombramentunan ku a tuma lugá durante e periodo 2003 te ku yüni 2007. Tampoko e ta krea konfiansa ku lo bai hasi algu ku e resultado di e investigashon. Komunidat tin ku eksigí ku Bestuurscollege ta atendé e asuntu aki i esun di nombramentu di sr. Schotte na serio i na un manera transparente i desidido i segun normanan di bon gobernashon..


Etienne van der Horst
22 Novèmber 2007