Despues di 8 siman a nombra komishon; awor ta kuantu tempu mester warda riba resultado di e trabounan di Komishon Nombramentunan?

Despues di mas ku 8 siman ku Bestuurscollege a risibí un karta di Gobièrnu Sentral tokante e nombramentunan tantu diskutí den nos komunidat, Bestuurscollege a tuma desishon siman pasa pa instalá un komishon ku mester bai investigá e nombramentunan. Bestuurscollege a disidí ku lo bai investigá tur nombramentunan for di yüni 2003 te ku yüni 2007. Esaki no ta lokual a haña Gobernador di Antia Hulandes su atenshon ni tampoko lokual Gobièrnu Sentral a pidi pa hasi. A pidi pa atendé e nombramentunan ku a tuma lugá durante e periodo di yanüari te ku yüni 2007.

Segun Kontrolaria General un kantidat di 353 funshon adishonal a keda presupuestá durante 2003 te ku 2006 (fuente: Onderzoeksrapport Indienstnemingen en Salarisbetaling Personeel Eilandgebied Curaçao – 21 yüni 2007 [por download esaki for di www.remetido.com]). Esaki ta enserá ku e komishon mester bai investigá mas ku 400 nombramentu inkluyendo esnan di e periodo yanüari te ku yüni 2007 ku ta mas o ménos 50. Ta Bestuurscollege su prerogativa kua nombramentunan adishonal e ke investigá pero e nombramentunan den e periodo yanüari te ku yüni 2007 mester tin prioridat, ta eseinan ta e “issue”.E komishon por investigá e nombramentunan aki promé i raporta na Gobièrnu Sentral pa despues sigui investigá sobrá.

Den kuadro di transparensia di gobernashon lo ta na su lugá si Bestuurscollege, basá riba e “Landsverordening Openbaarheid van Bestuur” (LOB [por download esaki for di www.remetido.com]), informá komunidat kiko e tarea di e komishon ta, kua ta e kriterionan ku lo bai apliká, ken ta e integrantenan di e komishon i dentro di kuantu tempu mester finalisá e enkargo. Pa por tin un base pa kompará e konklushonnan di e komishon ku e konklushonnan di e konseho hurídiko ku Gobièrnu Sentral a risibí tokante e nombramentunan i e konklushonnan di Kontrolaria General menshoná den su rapòrt di yüni 2007, mester apliká un sèt di kriterionan ekivalente. Pues e komishon mester apliká e kriterionan ku tabata base pa e konseho hurídiko i e kriterionan ku Kontrolaria General a apliká ku ta ankrá den reglanan i proseduranan vigente di Teritorio insular di Kòrsou (Toetsingsctiteria Commissie Indienstnemingen/Personeelsstop). Ta importante tambe pa konsiderá bon ken mester apuntá komo integrante di e komishon. Lo ta bon pa banda di representantenan di servisionan di Gobièrnu Insular tin un representante di e entidat ku a duna Gobièrnu Sentral e konseho hurídiko i un representante di Kontrolaria General. E dos entidatnan aki mester ta representá den e komishon pa garantisá ku ta apliká e kriterionan ku nan a apliká. Ta bon tambe pa apuntá un representante di sindikato ABVO den e komishon pasobra un maneho di personal konsistente ta na interes di su miembronan i alabes e por perkurá ku e asuntu di nombramentu no drenta den doofpot pasobra un kos ku ta sigur ta ku Bestuurscollege no tin purá pa atendé e asuntu di nombramentu. E komishon lo por hasi e promé parti di e investigashon den 1 luna di tempu. Ta trata di mas o ménos 50 nombramentu ku, si investigá 5 pa dia, tur por keda kla den 2 siman i por tuma 2 siman mas pa traha e raportahe final di e investigashon.

E pregunta por wòrdu hasi ta kiko mester sosodé ku e nombramentunan ku mester tuma lugá durante e periodo ku e komishon ta hasiendo su trabou. Kua garantia komunidat tin ku lo no tin nombramentu mas kontra di regla i prosedura i/òf kontra di interes di pais? Lo ta bon pa e komishon duna su konseho na Bestuurscollege riba kada proposishon di nombramentu aplikando tur kriterio ku nan ta apliká den nan trabou di investigashon.

Nos tin ku perkurá ku banda di supervishon riba tereno di finansa nos no haña nos konfrontá ku supervishon riba tereno di maneho di personal.


Etienne van der Horst
6 novèmber 2007