Eks-Diputado a hasi mal uso di credit card di Gobièrnu? Kiko awor?

Un matitino a informá siman pasá ku un eks-diputado ku a aparesé riba un lista di partido durante último elekshon a hasi mal uso di un creditcard di Gobièrnu. For di dokumentonan ta resultá ku e a usa e credit card pa metanan personal i nunka a paga bek. E direktor di e instituto ku tabata kai bou di e eks-diputado a atvertí e eks-diputado riba esaki pero e a sigui hasi mal uso di e credit card. E situashon a bira insoportabel pa esnan kende tabata traha den kontrolaria i atministrashon di e instituto. E aktonan di e eks-diputado a kousa hopi konflikto den pasado lagando vários persona kapasitá bandoná e servisio i nunka mas ningun instansia a tuma inisiativa pa sigui investigá e asuntu aki e matutino ta finalisá bisando.
Probablemente no ta trata di un servisio di Gobièrnu pasobra ta menshoná e funshon di direktor anto servisionan di Gobièrnu Insular no konosé e funshon di direktor pero di hefe di servisio. Pues tin indikashon ku ta trata aki di un instituto ku ta un N.V. òf fundashon di Gobièrnu.

Kiko por hasi den un kaso asina? Mester investigá un akusashon serio asina mas pronto ku ta posibel pa sea kontrarest’é òf pa tuma medida apropiá si resultá ku e akusashon ta bálido. Komunidat no tin mag di akseptá ku e asuntu aki ta keda denunsiá pero no investigá debidamente. Un diputado ku ta hasi mal uso di un credit card di gobièrnu ta tacha integridat di Bestuurscollege en general i nos gobernantenan en partikular i den e kaso aki tambe di e instituto di Gobièrnu konserní i no ta kontribuí na bon gobernashon. Tin vários manera ku por laga investigá e kaso aki.
(1) Na promé lugá por aserka Defensor di Pueblo ku un keho pidiendo e pa hasi un investigashon. Defensor di Pueblo por disidí tambe pa start un investigashon riba su propio inisiativa (ambtshalve).
(2) Na di dos lugá, si ta trata di un NV òf un fundashon di Gobièrnu, e aktual hunta di komisario òf direktiva por laga investigá e denunsia aki i si lokual ta ser bisá ta bèrdat por tuma akshon pa evitá ku esaki lo tuma lugá atrobe den futuro i, si tin mester via e kaminda hurídiko, eksigí ku e eks-diputado ta paga e sèn bek.
(3) Na di tres lugá Bestuurscollege mes por tuma e inisiativa pa laga SOAB hasi un investigashon. Ta integridat di Bestuurscollege i nos mandatarionan en partikular a keda tachá i no por laga e asuntu aki den doofpot. Den pasado SOAB a yega di hasi un investigashon riba supuesto mal uso di credit card dor di un mandatario ku tabata enkargá ku e Fundashon di Gobièrnu CTDF/CTB. Den e kaso ei SOAB a fórmula instrukshonnan pa uso di credit card di Gobièrnu pa evitá mal uso den futuro.
(4) Na di kuater lugá, si ta trata di un Fundashon di Gobièrnu, interesadonan (belanghebbenden), por ehèmpel e empleadonan di e fundashon, por aserka e direktiva di e fundashon i a base di artíkulo 54 sekshon 1 di Kódigo Sivil Buki 2 puntra pa klaridat riba e akto aki di mal maneho. Den kaso si no bini un reakshon di direktiva òf ku e interesadonan no ta satisfecho ku e aklarashon, nan por aserka hues i puntra pa laga hasi un investigashon.
Dependé di e resultado di e investigashon hues por disidí pa tuma sierto akshon. Den kaso ku e resultado ta ku en bèrdat a hasi uso di credit card pa metanan personal lo por pidi hues pa disidí ku e eks-diputado tin ku paga e instituto e sèn bek.
Komunidat ni Gobièrnu tin mag di laga e asuntu aki keda den doofpot. Si nos ke bira un pais outónomo den reino nos mester kuminsá traha riba nos normanan i balornan pa asina nos bai haña e rèspèt ku nos meresé komo pais outónomo. Esnan ku tin ku guia nos den e proseso aki, ku ta nos mandatarionan, mester duna e bon ehèmpel.


Etienne van der Horst
11 Novèmber 2007