Oportunidat pa Bestuurscollege demonstrá disponibilidat pa apliká bon gobernashon riba tereno di nombramentu di hende den servisio di gobièrnu i revoká nombramentunan ku no a tuma lugá segun regla i prosedura vigente.

ABVO: nombramentunan ta fuera di tur proporshon (18 yüni 2007), Forsa Kòrsou: revoká tur nombramentu ku ta kontra regla mes ora (18 yüni 2007), Pueblo Soberano ta sensura tur nombramentu polítiko (18 yüni 2007), Man; sistema aktual di nombramentunan polítiko mester keda remplasá pa un sistema nobo ku ta mas transparente i ta tene kuenta ku bon gobernashon i ku tambe ta konta ku konfiansa di komunidat (21 yüni 2007), Gobernador di Antia ke tur dokumento relashoná ku nombramentunan último (30 yüni 2007), Partidonan di koalishon (PAR, PNP i FOL) ta bai instalá un komishon pa investigá último nombramentunan (yüni 2007), Kontrolaria General: Bestuurscollegenan di turno ta desviá riba un base regular di e paro apsoluto pa tuma hende den servisio lokual e tin outoridat pa hasi pero den ningun di e kasonan ku a desviá Bestuurscollege a motivá esaki sufisiente lokual ta un eksigensia di bon gobernashon (27 yüni 2007), VBC: nombramentunan polítiko mester wòrdu revoká pasobra nan ta hasi daño severo na e aparato di gobièrnu (7 yüli 2007), DP ta hala atenshon di Bestuurscollege riba nombramentunan dudoso i ta bisa ku lo ta na su lugá si partidonan di koalishon mustra otro riba nan responsabilidat di gobernashon i revoká nombramentunan ku no a tuma lugá segun regla i normanan vigente (14 ougùstùs 2007), Gobièrnu Sentral di Antia: tin indikashon ku posiblemente den sierto kaso(nan) ta trata di nombramentu ku no ta kuadra ku lei i/o interes general di pais i Bestuurscollege tin 2 siman di tempu pa koregí esakinan pa evitá ku Gobièrnu Sentral tin ku aktua den kuadro di alto supervishon kontra sierto di e nombramentunan (31 ougùstùs 2007).

E nombramentunan a kousa basta reakshon den nos komunidat i te ainda ta basta komentá. No ta konosí si partidonan di koalishon (PAR, PNP i FOL) a instalá e komishon kaba ku lo bai investigá e nombramentunan resien i si esaki a kuminsá ehekutá su tarea.
Konseho Insular ta bai tin un reunion públiko djaluna 3 di sèptèmber 2007 over di e rapòrt di Kontrolaria General ku ta trata tumamentu di hende den servisio i pago di salario. Den e reunion aki Konseho Insular pa medio di un òf mas moshon por duna Bestuurscollege instrukshon kon tin ku atendé ku e nombramentunan. Ta Konseho Insular tin e responsabilidat final pa ku maneho en general i maneho di personal en partikular di Teritorio Insular di Kòrsou. Ta di spera ku tantu partidonan di oposishon komo esnan di koalishon ta duna Bestuurscollege instrukshonnan ku no ta laga ningun duda over kon mester atendé ku e nombramentunan ku no a bai segun reglanan i proseduranan vigente. Ta un oportunidat úniko nos mandatarionan tin pa demonstrá komunidat ku nan tin disponibilidat pa hiba bon gobernashon riba tereno di nombramentu di hende den servisio di gobièrnu insular. Manera ya kaba menshoná tin partidonan polítiko ku ta atmití ku e manera ku e nombramentunan polítiko a tuma lugá te awor aki no ta kuadra ku reglanan di bon gobernashon. Ta algu ku Kontrolaria General a konstatá kaba i awor Gobièrnu Sentral tambe.
Nos por puntra nos mes si departamentunan di Gobièrnu Insular manera entre otro departamentu di rekurso humano (PZCB) i departamentu di asuntunan general i hurídiko (AJZ), riba propio inisiativa (ambtshalve), a yega di atvertí i/òf konsehá Bestuurscollegenan di turno tokante nombramentunan ku den transkurso di años no a tuma lugá segun reglanan i proseduranan vigente. Si esaki ta e kaso lo ta interesante pa komunidat haña sa kon Bestuurscollege(nan) a reakshoná riba esaki i si esaki no ta e kaso ta interesante pa sa di kon e departamentunan no a hasi esaki. Nos ta di opinion ku esaki ta un deber di e departamentunan sino nan tambe ta kómplise na stroba aplikashon di bon gobernashon. Defensor di pueblo den su introdukshon na un anochi di informashon na Universidat di Antia 16 di ougùstùs 2007 a trese dilanti ku e rapòrt di Kontrolaria General tokante nombramentu di hende den servisio i pago di salario ta menshoná hopi kos ku ta indiká ku departamentunan di Gobièrnu (Rekurso Humano i Finansa) tambe tin falta den e situashon ku Kontrolaria General a konstatá.
Manera menshoná kaba awor tin un oportunidat úniko pa tur aktornan demonstrá ku ta tuma bon gobernashon na serio.

Tin un oportunidat úniko tambe pa un di nos miembronan di Konseho Insular ku algun tempu pasa tabata i te ku awor ta punto di atenshon públiko dor ku su nombramentu na un servisio di gobièrnu insular tambe ta forma parti di e nombramentunan tantu diskutí. Nos por a tuma nota den medionan di komunikashon ku un empleado públiko ku ta sinti su mes perhudiká den su karera ku e nombramentu di e miembro di Konseho Insular na su departamentu a hiba Bestuurscollege korte. Konsiderando e echo ku e nombramentu aki ta wòrdu mira komo unu kontroversial, e echo ku diferente partidonan den Konseho Insular ta kondená e manera ku nombramentunan polítiko ta tumando lugá, e echo ku Kontrolaria General a konfirmá ku Bestuurscollegenan di turno riba un base regular a desviá di e paro apsoluto pa tuma hende den servisio sin tene kuenta ku eksigensianan di bon gobernashon, e echo ku a base di un konseho hurídiko Gobièrnu Sentral a konstatá ku tin indikashon ku posiblemente den sierto kaso(nan) ta trata di nombramentu ku no ta kuadra ku lei i/o interes general di pais i tambe konsiderando e echo ku un empleado públiko ta sinti su mes perhudiká dor di e nombramentu lo ta na su lugá pa e miembro di Konseho Insular pidi pa revoká e nombramentu. Hasiendo esaki e ta habri kaminda bek pa e empleado públiko por sigui ku su karera i ku Bestuurscollege no tin nodi di paga pa asistensia hurídiko pa defendé un kaso den korte ku a keda krea dor di un desishon ku no ta kuadra ku normanan di bon gobernashon.

Ohalá e diskushonnan ku a tuma lugá i te ainda ta tumando lugá i lo sigui tuma lugá den nos komunidat riba entre otro tópikonan manera nombramentunan polítiko ta e gasolin pa e motor ku tin ku bai drei pa nos konstruí un pais Kòrsou nobo den kual Gobièrnu, tantu Bestuurscollege komo Konseho Insular, ta duna komunidat un bon ehèmpel aplikando bon gobernashon.



Etienne van der Horst

2 sèptèmber 2007