Bestuurscollege a kumpli ku instrukshon di Gobièrnu Sentral i a koregí/revoká nombramentunan ku a bai robes?

Fin di yüni 2007 Gobernador di Antia Hulandes a pidi Gezaghebber di Kòrsou si e por risibí tur dokumentunan relevante tokante e nombramentunan ku a tuma lugá resientemente. Gobernador a manda e informashon aki pa Gobièrnu Sentral pa esaki sigui kana e pasonan nesesario entre nan buska konseho hurídiko.
Basá riba e konseho hurídiko risibí Gobièrnu Sentral a yega na e konklushon ku tin indikashon ku posiblemente – den sierto kaso(nan) – ta trata di nombramentu ku no ta kuadra ku lei i/o interes general di pais. Gobièrnu Sentral a informá Bestuurscollege tokante esaki den un karta i a duna Bestuurscollege 2 siman di tempu pa koregí esakinan i reportá bek na Gobièrnu Sentral pa evitá ku e tin ku aktua den kuadro di alto supervishon kontra sierto di e nombramentunan (medionan di komunikashon 31 di ougùstùs 2007). Entretantu mas ku 3 siman a pasa i no ta konosí si Bestuurscollege a kumpli ku e instrukshon di Gobièrnu Sentral. Si no a kumpli, Gobièrnu Sentral mester asumí su responsabilidat ku entre otro ERNA ta brinda i aktua pa perkurá ku ta apliká bon gobernashon riba islanan di Antia Hulandes i den e kaso aki Kòrsou en partikular. Den deklarashon di gobernashon di Gobièrnu Sentral ku signatura di PAR di aña pasa ta wòrdu menshoná entre otro ku e gobièrnu aki ke hiba un maneho estrikto di integridat i ku e no ta bèk pa su responsabilidatnan. Tambe e deklarashon ta bisa ku ser in-desisivo no ta brinda solushon pa nada i pa esei esaki no ta un opshon pa e Gobièrnu aki .
Komunidat di Kòrsou no por tolerá ni akseptá ku ta konstatá ku tin indikashon ku posiblemente kosnan no a bai segun lei i/òf no ta na interes general di pais i Gobièrnu Insular no ta aktua pa koregí esaki. Komunidat no por tampoko akseptá ni tolerá ku Gobièrnu Insular posiblemente ta krea e impreshon ku ta neglishá un proseso ku Gobernador di Antia a inisiá. Komunidat mester eksigí di su mandatarionan ku nan ta asumí nan responsabilidat i aktua, i den kuadro di transparensia ta informá komunidat kiko e resultado ta di e follow-up riba e karta di Gobièrnu Sentral pa no krea e impreshon ku ta tolerá situashonnan ku no ta kuadra ku leinan vigente i/o no ta na interes general di pais.
Lo ta interesante tambe por ehèmpel pa komunidat haña sa kiko Defensor di Pueblo a haña komo kontesta riba su karta ku e a manda pa Bestuurscollege tokante un di e nombramentunan tantu diskutí. Tambe lo ta interesante pa wak kiko Konseho Insular ta bai hasi si resultá ku Bestuurscollege no a aktua na tempu riba e karta di Gobièrnu Sentral. Den kaso ku Gobièrnu Sentral tin ku bai aktua den kuadro di alto supervishon ta pasobra Konseho Insular no por apliká su outoridat di supervishon riba Bestuurscollege.
Alto supervishon di parti di Gobièrnu Sentral ta relatá na diferente tèrminonan regla den lei den kual mester tuma sierto akshonnan. Laga nos spera ku tantu Gobièrnu Sentral komo Bestuurscollege ta tene nan mes na e tèrminonan aki pa despues komunidat no bin tende ku a pèrdè e oportunidat pa aktua pasobra no a kumpli ku e tèrminonan preskribí den lei. Laga nos tampoko no bin tende ku no por a aktua mas pa motibu ku a tarda muchu i no por tuma medida mas ku ta afektá e posishon hurídiko di e personanan nombra den servisio di Gobièrnu. Gobièrnu Sentral tabata hopi desisivo ora mester a aktua den kuadro di e kaso di oumento di salario i areglo di penshun pa nos mandatarionan riba nivel insular. Nos ta spera un mesun aktuashon desidido den e kaso di e nombramentunan maske esaki por trese tenshon den koalishon pa motibu ku un di e partnernan di e koalishon aktual riba nivel insular tambe a koperá ku e nombramentunan. Bon Gobernashon ta pidi pa akshon!

Etienne van der Horst

22 sèptèmber 2007