Buki number 2 di Kódigo Sivil di Antia Hulandes ta brinda posibilidat pa laga skrutina maneho di direktiva di fundashonnan.

Bon Gobernashon ta dependé gran parti di presensia di un sistema di kòntròl ku tambe ta wòrdu yama un sistema di “checks and balances”. Mester apliká e sistema di kòntròl aki si, si nos ke pa e aportá na bon gobernashon. Interesadonan (belanghebbenden) tin e derecho i nos por bisa te hasta e obligashon pa apliká sistemanan di kòntròl.

Riba 1 di Mart 2004 Buki 2 di Kódigo Sivil di Antia Hulandes a drenta na vigor. E dokumento aki ta un di e sistemanan di kòntròl ku tin na nos disponibilidat. E artíkulonan ta atendé entre otro responsabilidat di supervishon di kompanianan anónimo i fundashonnan i mas en partikular kiko por hasi si e supervisornan no asumí nan responsabilidat na un manera ku bon gobernashon ta eksigí. Artíkulonan 50 te ku 57 ta atendé fundashonnan. Artíkulo 54 sekshon 1 ta bisa ku si tin duda serio si un direktiva ta sigui leinan òf statutonan na un manera korekto òf si e direktiva no ta hiba maneho den e fundashon na un manera korekto ministerio públiko òf interesado(nan) ku tin interes(nan) pa ku e maneho tin e outoridat pa pidi direktiva di e fundashon pa informashon al kaso.
Den kaso ku e direktiva no ta reakshoná riba e petishon òf no ta kumplí sufisientemente ku e petishon, hues riba petishon di ministerio públiko òf e interesado(nan) por apuntá un investigador ku e enkargo pa investigá e maneho i prosedernan na e fundashon durante un tèrmino spesífiko i pa dentro di un sierto lapso di tempu reportá na dje. Hues por duna instrukshonnan tambe na e investigador pa e manera ku e investigashon mester tuma lugá. E direktiva di e fundashon ku ta bai wòrdu skrutina ta obligá pa duna tur koperashon rekerí. Riba petishon di e investigador hues por tende testigunan i ekspertonan. Tambe riba petishon di e investigador òf di e interesado(nan) ku a inisiá e proseso di investigashon hues, despues di a tende e investigador, por tuma medidanan ku ta enserá entre otro suspenshon di un desishon di un direktiva òf revokashon (parsialmente) di un desishon òf suspenshon di implementashon di un desishon. E por tambe suspendé un òf mas miembro di direktiva, temporalmente apuntá un òf mas miembro di direktiva, temporalmente desviá di e stipulashonnan di statutonan kual e ta indiká, temporalmente kita derecho di voto di miembro(nan) di direktiva, i ordená pa tuma sierto akshon òf laga di tuma sierto akshon. Esakinan ta medidanan ku ta bai hopi leu i ta ilustrá ku Buki 2 di Kódigo Sivil ta tuma bon gobernashon hopi na serio.
Artíkulo 55 ta stipulá ku riba petishon di ministerio públiko òf interesado(nan) hues por retirá un miembro di un direktiva den kaso e miembro ta hasi òf laga di hasi algu ku ta den violashon ku lei òf statutonan di e fundashon òf den kaso ku for di e investigashon hasí basá riba artíkulo 54 a resultá ku e miembro a apliká mal maneho òf ku su aktuashon ta stroba bon funshonamentu di e direktiva. Hues por disidí ku un miembro di direktiva ku e ta retirá no por bira miembro mas di un direktiva durante un periodo di 5 aña.

Último tempu nos por tuma nota den medionan di komunikashon ku tin tópikonan den diskushon ku por krea e impreshon den komunidat ku nan ta kontroversial. Direktiva di CTDF a tuma un desishon pa kontratá un kompania di merkadeo na Merka ku a hasi un oferta ku un preis muchu mas haltu ku lokual ta pagando e kompania ku ta hasiendo e trabou di merkadeo na Merka te na e momento aki. Si tin interesadonan ku ta haña ku esaki por afektá nan interes negativamente nan por hasi uso di nan derecho manera preskribí den artíkulo 54 di Buki 2 di Kódigo Sivil. E interesadonan por ta entre otro empleadonan di e fundashon pero kisas tambe te hasta un entidat ku tin representashon den direktiva mes.
Pa loke ta trata un otro fundashon di gobièrnu ku ta FKP nos por tuma nota di un diskushon ku ta tumando lugá riba un eventual kompra di tereno na Fòntein pa un preis muchu mas haltu ku a keda ofresé na FKP mes algun tempu pasa. Segun informashon ku a sali den medionan di komunikashon, tantu un komishon interno komo gerensia a konsehá direktiva pa no kumpra e tereno na Fòntein pero aparentemente tin prekupashon ku direktiva, no opstante e konsehonan, lo bai di akuerdo pa kumpra e tereno tòg. Na mi opinion empleadonan di FKP, komo interesadonan, por hasi uso di nan derecho basa riba artíkulo 54 di Buki 2 di Kódigo Sivil i aserka direktiva pa klaridat.

Ta bon pa tur interesadonan di kompanianan anónimo i fundashonnan tuma nota di e kontenido di Buki 2 di Kódigo Sivil di Antia Hulandes pa asina kontribuí na desaroyo di bon gobernashon ku na mi opinion ta un base importante pa nos konstruí nos pais Kòrsou nobo pa kual nos tur ta deseá un bon bienestar duradero.


Etienne van der Horst
12 sèptèmber 2007