Kódigo di kondukta pa Bestuurscollege di Teritorio Insular di Kòrsou; un paso den bon direkshon

Ku introdukshon di un kódigo di kondukta pa Diputadonan, Sekretarionan i Gezaghebber, Bestuurscollege a hasi un paso den bon direkshon pa gana konfiansa bek di e siudadano. E rapòrt Konfiansa, ku a keda publiká na 1999, ta menshoná entre otro ku ta deseabel pa riba tèrmino kòrtiku bini ku un kódigo di kondukta. E rapòrt ta bisa tambe ku mester duna prioridat na promové, entre otro, integridat polítiko i di gobernashon. Sin integridat gobièrnu no ta disfrutá di konfiansa di siudadanonan. Nos ta 10 aña mas leu pero mihó lat ku nunka.
E filosofiá di e kódigo di kondukta presentá pa Bestuurscollege ta enserá ku e integridat di aktuashon di mandatarionan ta indiskutiblemente relatá na e siudadano su konfiansa den gobièrnu. “Ora integridat di mandatarionan ta na diskushon e konfiansa den i e legitimashon di gobernashon públiko por keda afektá. E konsekuensia di esaki ta ku mandatarionan kontinuamente mester ta konsiente ku nan ta traha pa e siudadano i ku na tur momento nan mester aktua na un manera ku ta digno pa e konfiansa di e siudadano”.

E stipulashonnan general di e kódigo di kondukta ta stipulá ku e kódigo ta disponibel pa públiko. Por haña e kódigo di kondukta aki riba e sait http://www.nos-ke-sa.blogspot.com/ den e kolumna “Links/Downloads”.
Banda di e stipulashonnan general di kondukta e kódigo ta inkluí tambe stipulasahonnan pa loke ta trata lealtat, rèspèt mutuo, trato, outoridat, toma di desishon, sinseridat, informashon/sekresía, konflikto di interes, tumamentu di regalo, intimidashon, chantahe i soborno, uso di fasilidatnan di gobièrnu, aktividatnan sekundario i aparishon públiko.

E rapòrt Konfiansa ta bisa ku e kòntròl riba kumplimentu ku e stipulashonnan di e kódigo di kondukta por keda poné den man di un órgano ku ta polítikamente independiente manera Kontrolaria General di Antia. Esaki ta parsemi un bon asuntu, mas a un ku artíkulo 32 insiso 1 di Landsverordening Algemene Rekenkamer 2002 (LARNA 2002) ta stipulá ku Kontrolaria General, sea riba su propio inisiativa òf riba petishon di Parlamento òf di un Konseho Insular, por investigá integridat di mandatarionan i ámtenarnan den ehersisio di nan tareanan i responsabilidatnan. No ta solamente Kontrolaria General mester ta enkargá ku kòntròl riba kumplimentu ku e stipulashonnan di e kódigo di kondukta; e siudadano tambe mester kontrolá si Diputadonan, Sekretarionan i Gezaghebber ta kumpli ku e kódigo di kondukta pasobra ta di e siudadano Gobièrnu ke rekobrá e konfiansa. Finalmente ta e gobernantenan mes mester koregí otro den kaso ku un di nan no ta kumpli ku e stipulashonnan di e kódigo di kondukta.

Ki dia nos por ferwagt un kódigo di kondukta pa Konseho Insular?


Etienne van der Horst
31 yanuari 2009

http://www.nos-ke-sa.blogspot.com/