Referèndem 2009; kon nos ta bai prepará nos mes i tokante kiko nos ta bai vota?

Bestuurscollege a primintí komunidat ku durante e promé mitar di aña 2009 lo tene un referèndem konsultativo tokante e akuerdonan ku a yega na dje durante e konferensha di mesa rondó di 15 di desèmber 2008 tokante futuro struktura estatal di Kòrsou. Na e momento aki no ta eksistí un lei na Kòrsou ku ta regulá tenementu di referèndem. Riba 3 di Òktober 2008 Bestuurscollege ta informá Konseho Insular den su karta di entrega di e konsepto di e Konstitushon pa Kòrsou ku un referèndem konsultativo semper ta posibel i no ta rekerí formalisashon. Esaki por krea e impreshon ku no tin mester di un lei pa tene un referèndem konsultativo.
Sinembargo na Hulanda tin diferente munisipio ku ta disponé di un tipo di lei asina. Un lei asina ta regulá asuntunan komo entre otro e pregunta ku ta na voto, e organisashon i informashon, e komishon di referèndem i e resultado di e referèndem.

Lei Hulandes ta kontené e definishon di referèndem ku ta bisa ku esaki ta un votashon di pueblo den kual esnan ku tin derecho di vota tin mag di ekspresá nan mes tokante un desishon ku e Konseho di Munisipio (den nos situashon komparabel ku Konseho Insular) tin ku tuma. Na esnan ku tin derecho di vota e pregunta ta wòrdu hasi si nan ta na fabor òf kontra e desishon ku e Konseho tin intenshon di bai tuma. Den kaso ku e desishon ku ta wòrdu konsiderá ta konsistí di mas parti ta skohe un formulashon ku ta kubri tur parti. E Kolegio (di Burgemeester i Wethouders), den nos situashon komparabel ku Bestuurscollege, ta perkurá pa un bon organisashon di e referèndem i un suministro kuidadoso di informashon tokante e referèndem. Banda di atenshon pa e prosedura ku tin ku sigui ta duna atenshon tambe na formulashon di e pregunta pa asina e votadónan por tuma nota di dje promé ku nan bai vota. Den e suministrashon di informashon mester informá e votadónan tambe tokante e argumentunan pa vota na fabor òf kontra e desishon ku Konseho di Munisipio tin intenshon di bai tuma.

Lei Hulandes ta regla tambe instalashon di un komishon di referèndem di kual e miembronan no tin mag di forma parti di e munisipio ni tin mag di traha pa e munisipio òf kai bou di responsabilidat di e munisipio den kual ta tene e referèndem. Den nos kaso ta trata di Gobièrnu Insular di Kòrsou.
Por lo general e komishon tin komo tarea pa supervisá e transkurso di e prosedura di referèndem, konsehá Kolegio i/o Konseho riba petishon òf riba su mes inisiativa tokante aplikashon di e lei di referèndem i supervisá e ophetividat di e informashon di parti di e munisipio. E komishon tambe ta enkargá pa atendé ku kehonan tokante e dunamentu di informashon dor di e munisipio. E Konseho di Munisipio ta nombra e miembronan di e komishon riba un rekomendashon di e Kolegio di Munisipio. Ta importante ku e miembronan di e komishon ta eksperto riba e diferente terenonan ku ta relevante. Tin munisipio ku ta rekerí ku en todo kaso un eksperto riba tereno di komunikashon i un hurista riba tereno di derecho atministrativo òf riba tereno di derecho estatal mester ta miembro di e komishon. Aparte di esei ta importante tambe pa tin un miembro ku ta na haltura di òf tin eksperiensha ku organisashon gubernamental riba nivel di munisipio. Pues ta trata di un komishon di eksperto. Por keda sin sigui e konsehonan di e komishon solamente si tin argumentunan di peso. E argumentunan mester ta bon motivá. Na 2005 nos Konseho Insular, kontra di e proposishon di e komishon di referèndem, a disidí pa kambia e sekuensia di e opshonnan i a pone e opshon ku ta tin e preferensia di e koalishon komo opshon A, den e kaso aki Kòrsou outónomo den Reino. E motivashon di e argumentunan pa esaki no tabata muchu kla.

Lei di referèndem di vários munisipio Hulandes ta stipulá ku e resultado di un referèndem ta konta komo un ekspreshon di rechaso di e desishon ku e Konseho di Munisipio ta konsiderá na momentu ku mayoria di e votadónan a vota kontra e desishon ku ta konsiderá i ku e mayoria aki ta por lo ménos 30% di esnan ku tin derecho di vota. Esaki ta enserá ku si nos tuma por ehèmpel e kantidat di persona ku ta tin derecho di vota durante e referèndem di 2005 (114.500) un mayoria di por lo ménos di 34.350 persona mester vota kontra e desishon ku ta konsiderá pa tuma pa asina nos por papia di un rechaso. Den kaso di un referèndem konsultativo un Konseho di Munisipio por pone e resultado di e referèndem un banda i tuma un desishon ku no ta konforme e resultado. E argumentunan pa hasi esaki naturalmente mester ta bon motivá.

Den e aklarashon di e konsepto di Konstitushon di Kòrsou ku Bestuurscollege a ofresé Konseho Insular riba 3 di òktober 2008 tin menshoná ku e Konstitushon di Kòrsou ta tene mas tantu ku ta posibel kuenta ku uniformidat konstitushonal den Reino. E Konstitushonnan di Hulanda i Aruba a para komo modelo pa e Konstitushon di Kòrsou. Esaki ta nifiká e ora ei tambe ku nos tin mag di sali for di e punto di bista ku e leinan di referèndem konsultativo di munisipionan Hulandes lo ta modelo pa e manera ku aworó nos lo bai prepará nos referèndem 2009, dun’é kontenido i implement’é?


Etienne van der Horst
11 yanüari 2009

www.nos-ke-sa.blogspot.com