Bestuurscollege no ta konvensé komunidat ku nombramentunan (polítiko) kontroversial lo bai pa historia.
Riba 10 di Desèmber 2008 Bestuurscollege a entregá Konseho Insular e rapòrt ku ela risibí for di 1 di Sèptèmber 2008 di e Komishon Nombramentunan ku e anunsio ku, entre otro, lo bai hasi un ouditoría di e departamentunan di Personal i RASE. Esaki Amigoe ta informá den e artíkulo “Audit personeelsbeleid bij eiland” den su edishon di 22 di Desèmber 2008. E motibu pa laga hasi e ouditoría no ta konosí pa komunidat ni e kontenido di e rekomendashonnan di e Komishon Nombramentunan. No ta konosí tampoko si entre tantu Bestuurscollege a tuma akshon riba nan. Ta parse ku komunidat ta keda apstené di informashon siendo ku un kantidat grandi di nombramentunan (polítiko) kontroversial a kousa hopi indignashon i desgusto den nos komunidat aña pasá. Nos tin mag di ferwagt di gobièrnu ku e ta aktua mas transparente si e ke konvensé komunidat ku e ke kibra ku e tradishon di nombramentunan (polítiko).
Den su edishon di 24 di Desèmber 2008 Amigoe ta informá den e artíkulo “Diensthoofden trekken zelden aan de bel” ku un di e rekomendashonnan di e Komishon Nombramentunan ta pa Bestuurscollege laga hasi un investigashon hurídiko eksterno tokante di e 32 nombramentunan kontra di kual 6 hefe di servisio a protestá serka Bestuurscollege. Nos ta puntra nos mes si entretantu e enkargo pa e investigashon aki a wòrdu duná kaba i si esaki no ta e kaso ainda, ki dia esaki lo tuma lugá òf si e lo bai tuma lugá mes ainda. By the way; un kòmplimènt pa e 6 hefenan di servisio ku ta tin e kurashi di protestá kontra di e nombramentunan den nan servisio.
Otro rekomendashonnan ku si ta públikamente konosí nos por haña den e rapòrt di Kontrolaria General “Rapport bevattende de uitkomsten van het onderzoek indienstnemingen en salarisbetaling personeel in het Eilandgebied Curacao – Juni 2007” (riba www.nos-ke-sa.blogspot.com por tuma nota di e rapòrt aki). Tambe e rekomendashonnan di SOAB, kual nan a keda presentá durante un anochi di informashon na UNA di e sindikato ABVO i e asosiashon di hefenan di servisio riba 2 di ougùstùs 2007, ta konosí. SOAB a rekomendá Bestuurscollege e tempu ei pa entre otro tuma un desishon riba e rapòrt ariba menshoná di Kontrolaria General. Tambe a rekomendá pa re-instituí e komishon “Beoordelingscommissie Indienstnemingen” ku a keda instalá na 1999 ora a introdusí e paro apsoluto di tumamentu di hende den servisio di gobièrnu i a rekomendá pa implementá e rekomendashonnan di Kontrolaria General i di SOAB mes. Nos ta puntra nos mes si entretantu Bestuurscollege a tuma akshonnan basá riba e rekomendashonnan aki.
E Komishon Nombramentunan a konstatá entre otro ku gobièrnu insular, tantu polítika komo e aparato públiko, no ta tene su mes na su mes reglanan riba tereno di selekshon i tumamentu di hende den servisio. Segun e Komishon esaki tin konsekuensia pa e kalidat i konfiabilidat di gobernashon. Esaki ta un konklushon hopi serio i mester ta un motibu di prekupashon pa kada siudadano.
Kon ta pará ku e prekupashon di Gobièrnu Sentral ku a keda desplegá na ougùstùs 2007 pa ku e nombramentunan kontraversial (polítiko)? Gobièrnu Sentral ta konvensí ku Bestuurscollege ta atendé e asuntu aki desidido? Lo ta na su lugá pa Bestuurscollege manda e rapòrt di e Komishon Nombramentunan pa Gobièrnu Sentral tambe informando Gobièrnu Sentral kua pasonan entretantu a tuma konkretamente a base di e rekomendashonnan di e Komishon Nombramentunan. Gobièrnu Sentral a mustra Bestuurscollege riba e posibilidat ku e por aktua a base di kapítulo 6 di “Eilandenregeling van de Nederlandse Antillen” (ERNA), ku ta regulá alto supervishon. Pero no tin nodi di yega asina leu si Bestuurscollege demonstrá ku sufisiente konvikshon ku e ta implementando e rekomendashonnan desididamente. Ta parse sinembargo ku ta falta aktuashon desidido i konsiderando ku e maneho di nombramentu ta unu polítikamente sensitivo, un opshon ta pa un entidat polítikamente independiente keda apuntá pa supervisá implementashon di e rekomendashonnan di Kontrolaria General, SOAB i e Komishon Nombramentunan. Kontrolaria General lo por ta e entidat polítikamente independiente en kuestion òf un komishon bou di su presidensia. Miembronan di un komishon asina por ta representantenan di sindikalismo i di otro gremionan den nos komunidat ku ta keda benefisiá ku un gobernashon di kalidat i konfiabel algu ku lokual hustamente na e momento aki tin duda riba dje serka di e Komishon Nombramentunan komo konsekuensia di e nombramentunan (polítiko) kontroversial.
Laga ta nèt awor e independensia di Kontrolaria General ta na peliger despues di e kambionan estatal.
Segun e artíkulo den Antilliaans Dagblad di 4 di Desèmber 2008, “Rekenkamer waarschuwt; onafhankelijkheid bij Land Curacao niet gewaarborgd” Kontrolaria General a atvertí Bestuurscollege i Konseho Insular na 3 okashon kaba pa un posibel influensia polítiko ora nombra miembronan di Kontrolaria General awor ku e konstitushon di Kòrsou ta di tal forma redigí ku ta limitá e independensia di polítika di Kontrolaria General. Tantu Bestuurscollege komo Konseho Insular no a hasi nada ku e petishon di Kontrolaria General pa papia riba nan prekupashon. Mirando e hecho ku un di e partidonan di e koalishon aktual den resien pasado a yega di krítika rapòrtnan di Kontrolaria General i su funshonamentu severo, ta parse ku banda di influensia polítiko riba funshonamentu di servisionan lo ke tin influensia polítiko tambe riba e funshonamentu di Kontrolaria General.
Bestuurscollege no ta konvensé komunidat ku berdaderamente e ke pone un paro na e era di nombramentunan kontroversial (polítiko). Nos komunidat mester sigui e desaroyo aki di aserka i ku hopi atenshon i si e no ta di akuerdo ku esaki e lo mester laga su bos resoná. Komunidat no tin benefisio ku un gobernashon di kual su kalidat i konfiabilidat ta na duda. Komo komunidat nos mester hasi uso di e oportunidat pa durante e proseso di kambionan di gobernashon den kuadro di e proseso di kambionan estatal, eksigí kondishonnan ku ta garantisá un grado haltu di kalidat i konfiabilidat di gobernashon (bon gobernashon) kaminda no tin espasio pa nombramentunan (polítiko) kontra di regla i prosedura.
Etienne van der Horst
28 Desèmber 2008
www.nos-ke-sa.blogspot.com
zondag 28 december 2008
Abonneren op:
Reacties posten (Atom)
Posts
Apresiable lesador,
BeantwoordenVerwijderenTal bes, Bestuurscollege no ta reakshoná pasombra entre awor i fin di mart
i komienso di april 2009 lo ta e periodo ku más tantu irregularidat lo bai tuma lugá?
A bisa tur ambtenar ku nan lo haña un offerta pa un trabou den Pais Korsou.
A splika den medionan di komunikashon ku lo ofresé un funshon igual na e funkshon ku e empleado publiko ta ehersé te na e momentu ei.
A base di kiko lo e empleadonan publiko aki haña e offerta ei? Lo tene kuenta ku resultadonan di e
Sistema di evaluashon ku yama PEP?
Awor si no tin resultado di e aparato di evaluashon ku yama PEP (Personeel Evaluatie programma) of si e resultadonan ta bou di nivel of malu kiko lo pasa? BC lo ofresé un empleado publiko asina tog mes un tipo di funkshon?
I awor e 32 personanan ku awor akí ta okupá un funshon ku nan no tin e preparashon ni e abilidat pa ehersé e funkshon ei, nan tambe lo haña un funkshon igual?
Tin asina tantu pregunta pero ni un politiko de BC of oposishon por splika ta kiko tei pasa. ABVO, PZCB i Stafburo no ta duna ni un klase di informashon. Ta keda ketu ketu.
No ta respondé riba rapportnan di ARNA, i Ombudsman.
Pero entre awor i fin di mart kominso di aprel lo mester bai akomodá tur medewerker ku awor ta traha den BC i tur e 32 kasonan ku te awe no ta duna pueblo un kontesta.
Kiermen nos lo por saka e konklushon ku no por respondé pasombra tin hopi mas na kaminda ku lo no por mira lus di dia.
Hopi lastima.
Un empleado publiko ku ke keda anonimo.
Ami no por kere ku tur ámtenar ta haña un oferta pa un trabou den Pais Kòrsou. Esaki ta enserá ku tantu e ámtenarnan na nivel di gobièrnu sentral komo na nivel di gobièrnu insular ta haña un oferta di trabou òf ta pa e ámtenarnan na nivel insular so esaki ta konta? En todo kaso mi ta sigur ku e aparato públiko nobo no ta un "optelsom" di e kantidat di ámtenar di tur dos nivel di gobiernu. Si bo a skucha bon tambe a papia di un plan sosial. Un plan sosial bo ta apliká ora bo bai vloei af hende. Pues lo bini afslanking di e aparato públiko sin mas. Ningun hende lo no ke papia riba esaki pasobra e no ta un tópiko popular. Mi ta kere si ku lo bai purba e kaminda di retiro boluntario promé.
BeantwoordenVerwijderenPa loke ta trata e 32 empleadonan nos mester warda wak si Bestuurscollege lo sigui e rekomendashon di e Komishon Nombramentunan i laga hasi un investigashon hurídiko eksterno pa despues wak si por terminá e relashon di trabou den kasonan spesifiko si ta trata di un relashon di trabou ku a keda realisá "onrechtmatig".