Nos ke sa kiko Bestuurscollege a hasi ku e rekomendashonnan di e Komishon Nombramentunan.

Aña pasa a lanta un diskushon públiko tokante nombramentunan polítiko ku a tuma lugá durante e periodo di yanüari te ku yüni 2007. Laga nos refreská nos memoria.

ABVO: “nombramentunan ta fuera di tur proporshon” (18 yüni 2007), Forsa Kòrsou: “revoká tur nombramentu ku ta kontra regla mes ora” (18 yüni 2007), Pueblo Soberano: “nos ta sensurá tur nombramentu polítiko” (18 yüni 2007), Man; “sistema aktual di nombramentunan polítiko mester keda remplasá pa un sistema nobo ku ta mas transparente i ta tene kuenta ku bon gobernashon i ku tambe ta konta ku konfiansa di komunidat” (21 yüni 2007), Gobernador di Antia ke tur dokumento relashoná ku nombramentunan último (30 yüni 2007), Partidonan di koalishon (PAR, PNP i FOL) ta bai instalá un komishon pa investigá último nombramentunan (yüni 2007), Kontrolaria General: “Bestuurscollegenan di turno ta desviá riba un base regular di e paro apsoluto pa tuma hende den servisio lokual e tin outoridat pa hasi pero den ningun di e kasonan ku a desviá Bestuurscollege a motivá esaki sufisiente lokual ta un eksigensia di bon gobernashon” (27 yüni 2007), VBC: “nombramentunan polítiko mester wòrdu revoká pasobra nan ta hasi daño severo na e aparato di gobièrnu” (7 yüli 2007), DP ta hala atenshon di Bestuurscollege riba nombramentunan dudoso i ta bisa ku lo ta na su lugá si partidonan di koalishon mustra otro riba nan responsabilidat di gobernashon i revoká nombramentunan ku no a tuma lugá segun regla i normanan vigente (14 ougùstùs 2007), Gobièrnu Sentral di Antia: “tin indikashon ku posiblemente den sierto kaso(nan) ta trata di nombramentu ku no ta kuadra ku lei i/o interes general di pais i Bestuurscollege tin 2 siman di tempu pa koregí esakinan pa evitá ku Gobièrnu Sentral tin ku aktua den kuadro di alto supervishon kontra sierto di e nombramentunan” (31 ougùstùs 2007). Diputado sra. Zita Leito: “Bestuurscollege a risibí un promé rapòrt di e komishon nombramentunan den kual a konstatá ku ningun di e 539 nombramentunan ku a tuma lugá durante e periodo Yanüari 2003 te ku Yüni 2007 a bai segun reglanan i proseduranan vigente” (yüli 2008). Segun Diputado Leito esaki ta un motibu di prekupashon i Bestuurscollege mester siña for di esaki. Tambe Diputado Leito a menshoná ku Bestuurscollege lo bai risibí un di dos rapòrt di e komishon den kual ta trata sierto nombramentu spesífiko.

Nos ta na 1 di desèmber 2008 i ainda no ta konosí pa pueblo di Kòrsou kiko Bestuurscollege a hasi ku e rekomendashonnan di e 2 rapòrtnan ku ela risibí di e Komishon Nombramentunan i kiko Bestuurscollege a hasi òf ta bai hasi pa evitá ku ta sigui ku nombramentunan kontra di regla i prosedura.
E nota di maneho, ku ta forma e base pa e presupuesto di 2009, kual Konseho Insular ta kuminsá trata e siman aki tampoko ta menshoná ku a òf ta bini kambio den e prosedura i reglanan di nombramentu den servisio di Gobièrnu. Lokual e nota si ta bisa ta:

“Departamentu di Personal lo partisipá den e Komishon ku ta manehá e vakaturanan i tumamentu di hende den servisio di Gobièrnu”.
“Departamentu di Stafburo lo evaluá e vakaturanan i tumamentu di hende den servisio di Gobièrnu den koperashon ku e departamentunan di Personal i di Finansa”.
“Gobernashon mester ta íntegro pasobra e mester duna ehèmpel na komunidat i perkurá pa e plaka di pueblo keda usá na un manera efektivo i hustifiká”.
“Mester tin transparensia den servisio i informashon”.
“Ta krea konfiansa i sosten serka pueblo ku logronan visibel i bon komunikashon”.
“Lo duna kontenido na publisidat i transparensia di gobernashon tokante maneho di Gobièrnu den e diferente sektornan pa medio di komunikashon proaktivo”.

Nos ke sa kiko Bestuurscollege a hasi ku e rekomendashonnan di e Komishon Nombramentunan. No tin nodi di warda te ora Konseho Insular a aprobá e nota di maneho 2009 pa apliká e tres último puntonan menshoná aki riba.


Etienne van der Horst
1 Desèmber 2008

www.nos-ke-sa.blogspot.com