Despues di 1 aña ainda no tin klaridat riba nombramentunan kontra di regla i prosedura.

Awe ta hasi eksaktamente 1 aña ku partidonan di koalishon a disidí ku lo instalá un komishon ku mester analisá tur nombramentunan ku a tuma lugá entre yanüari i yüni 2007 pa wak si esakinan a tuma lugá segun proseduranan i reglanan establesé.
Fin di yüni 2007 Gobernador di Antia Hulandes a pidi Gezaghebber di Kòrsou si e por risibí tur dokumentunan relevante tokante e nombramentunan.
Basá riba un konseho hurídiko Gobièrnu Sentral a yega na e konklushon ku tin indikashon ku posiblemente – den sierto kaso(nan) – ta trata di nombramentu ku no ta kuadra ku lei i/o ta den interes general di pais. Gobièrnu Sentral a informá Bestuurscollege tokante esaki den un karta dia 30 di ougùstùs 2007 i a duna Bestuurscollege 2 siman di tempu pa reakshoná kon ta bai atendé e nombramentunan i raportá bek na Gobièrnu Sentral pa evitá ku esaki tin ku aktua den kuadro di alto supervishon kontra sierto nombramentunan.
Diferente partido di oposishon a ekspresá nan mes bastante kritiko riba e nombramentunan den medionan di komunikashon: Pueblo Soberano: “ta sensura tur nombramentu polítiko” (18 yüni 2007), Forsa Kòrsou: “revoká tur nombramentu ku ta kontra regla mes ora” (18 yüni 2007) i DP: “lo ta na su lugá si partidonan di koalishon mustra otro riba nan responsabilidat di gobernashon i revoká nombramentunan ku no a tuma lugá segun regla i normanan vigente” (14 ougùstùs 2007).
Partido Pueblo Soberano a laga sa tambe ku e lo bini ku un proposishon pa evitá tipo di nombramentu asina den futuro.
Defensor di Pueblo a manda un karta ku pregunta pa Bestuurscollege tokante un di e nombramentunan tantu diskutí.

Na unda nos ta pará awor 1 aña despues? E komishon di kual dia 30 di yüni 2007 a anunsiá ku e lo bai keda instalá, a keda instalá dia 19 di òktober 2007 (3½ luna despues). E komishon lo mester a keda kla ku su investigashon i raporta bèk na Bestuurscollege no mas tarda dia 14 di desèmber 2007. Segun Diputado di Asuntunan di Personal sra. Zita Leito e komishon a entrega un rapòrt provisorio na Bestuurscollege (Mart 2008).
No ta konosí si Gobièrnu Sentral i Gobernador di Antia Hulandes a risibí un reakshon final di Bestuurscollege tokante e nombramentunan. No ta konosí si e partidonan di oposishon den Konseho Insular, ku tabata tin tantu krítika riba e nombramentunan, a sigui vigilá e progreso di Bestuurscollege su akshonnan relashoná ku e karta di Gobièrnu Sentral. No ta konosí si partido Pueblo Soberano a bini ku e proposishon manera anunsiá. No ta konosí tampoko si Defensor di Pueblo a risibí kontesta di Bestuurscollege riba su karta.
Despues di 1 aña komunidat no tin klaridat ainda kiko Bestuurscollege ta bai hasi ku e nombramentunan tantu diskutí i kiko ta bai hasi pa evitá tipo di nombramentunan aki den futuro.
Kuantu mas nos tin ku warda?


Etienne van der Horst
30 Yüni 2008