Nos mes por supervisá nos atministrashon di finansa?

Dia 29 di Mei 2008 Kontrolaria General (K.G.) a entrega su rapòrt na Konseho Insular konteniendo su opheshonnan i remarkenan relashoná ku e investigashon ku K.G. a hasi tokante e kuenta anual di Teritorio Insular di Kòrsou pa aña 2001. Meta di e investigashon tabata pa duna un opinion tokante e atministrashon finansiero hibá pa Bestuurscollege i su responsabilisashon pa ku esaki. A investigá (1) si kompromisonan, gastunan i entradanan a tuma lugá segun e presupuesto aprobá di 2001, (2) si a perkurá pa un atministrashon finansiero ordená i kontrolabel, (3) si responsabilisashon finansiero a tuma lugá segun instrukshonnan i (4) si e responsabilisashon finansiero ta duna un bon bista di e atministrashon finansiero hibá.
Kontrolaria General a konkluí ku (1) pa gran parti kompromisonan, gastunan i entradanan no a tuma lugá segun e presupuesto aprobá di 2001 ni segun otro leinan relevante, (2) e atministrashon finansiero no ta ordená ainda, (3) e responsabilisashon finansiero no ta hasí segun instrukshonnan ku ta konta p’esaki i (4) e responsabilisashon no ta duna un bon bista di e atministrashon finansiero hibá. A konstatá erornan pa ku legalidat; Nafl. 149 mion a ser gasta sin ku esaki tabata presupuestá i Nafl. 89 mion a ser otorgá komo supsidio no konforme e ordenansa di supsidio. Tambe a konstatá erornan di konfiabilidat pa ku un montante di Nafl. 121 mion i un inseguridat pa ku un montante di Nafl. 828 mion. E inseguridat aki ta resultado di falta di un organisashon atministrativo adekuá inkluyendo kòntròl interno i falta di atministrashon.

Kontrolaria General a informá Bestuurscollege riba 12 di Mart 2008 ku e no por aprobá e kuenta anual di 2001. Kontrolaria General apénas a mira adelanto den eliminashon di e motibunan ku ta kousa un atministrashon finansiero insufisiente. SOAB, ku pa promé bia a kontrolá un kuenta anual di Teritorio Insular di Kòrsou, a otorgá un deklarashon di akountent di desaprobashon pa e kuenta anual di 2001. Si Bestuurscollege en bèrdat ke yega na un situashon kontrolabel esaki no por ta otro sino di traha ku rapides riba mehorashon di e kalidat di e organisashon atministrativo i kòntròl interno pero tambe mester eliminá envolvimentu direkto di diputadonan den trabounan operashonal.
Segun K.G. mehorashon di e organisashon atministrativo no mester ta kompliká. Mester tuma algun medida básiko. No tin èksküs pa no tuma e medidanan aki riba tèrmino kòrtiku pa asina den algun aña por yega na e situashon deseabel.

Kontrolaria General a pidi Bestuurscollege den su karta di 12 di Mart 2008 pa den 2 luna di tempu duna su komentario riba e rapòrt di K.G. Bestuurscollege no a reakshoná. Awor palabra ta na Konseho Insular. E último kuenta anual ku Konseho Insular a aprobá ta esun di 1988. Tan leu ku K.G. por a averiguá Konseho Insular no a aprobá e kuentanan anual di 1989 te ku 2000 (12 aña). Kontrolaria General no a aprobá ningun di e kuentanan anual aki pa motibunan menshoná den nan rapòrtnan di kòntròl.
Un di e tareanan prinsipal di Konseho Insular ta pa supervisá ehekushon di maneho di parti di Bestuurscollege. Konseho Insular por puntra Bestuurscollege pa responsabilisá su mes pa e atministrashon finansiero ku e a hiba i kiko e a hasi kaba i lo bai hasi pa remediá e situashon ku K.G. a bin ta konstatá pa basta aña konsekutivo kaba. No laga nos warda te ku 2014 pa nos bin tende e mes un kosnan di K.G. riba e kuenta anual di 2007 ku nos tin ta tende riba e kuentanan anual for di 1989. Pa motibu di retraso den preparashon i aprobashon di kuentanan anual no por evaluá na un manera efektivo si e akshonnan ku Bestuurscollege a tuma i ta tumando ta duna e resultadonan deseá. Ta sèn di komunidat ta atendé kuné i pueblo di Kòrsou tin mag di eksigí ku ta atendé esaki na un manera responsabel.
Nos mes por supervisá nos atministrashon di finansa?


Etienne van der Horst
23 Yüni 2008