Defensor di Pueblo tei entre otro pa fortifiká tarea di kòntròl di Konseho Insular.

E “Memorie van Toelichting di e Lei “Eilandsverordening Ombudsfuctionaris” ta menshoná ku un di e 6 tareanan prinsipal di Defensor di Pueblo ta fortifiká e funshon di kòntròl di Konseho Insular. Segun e aklarashon di artíkulo 2 den e “Memorie van Toelichting” Defensor di Pueblo mester wòrdu konsiderá komo un apoderado di Konseho Insular maske ku den su funshonamentu e no ta resortá bou di ningun entidat.

E dianan aki e relashon entre Defensor di Pueblo i Bestuurscollege ta mashá den publisidat atrobe. Nos por tuma nota ku Bestuurscollege te hasta a laga sa ku e no tin konfiansa mas den Defensor di Pueblo i a aserká Konseho Insular pa sa kiko su opinion ta pa ku integridat di Defensor di Pueblo. No tabata na nodi pa e situashon a yega asina leu. Tantu Bestuurscollege komo Konseho Insular tabata, i te ainda ta, den posishon pa krea e kondishonnan pa drecha e relashon.

Nos por a tuma nota den medionan di komunikashon ku Defensor di Pueblo a bisa ku na diferente okashon e a aserka Bestuurscollege(nan) ku e petishon pa instalá e komishon menshoná den artíkulo 8 di “Eilandsverordening Ombudsfunktionaris”. Pa lei e komishon aki mester keda instalá. E komishon tin komo tarea pa entre otro, riba petishon òf riba su mes inisiativa, duna konseho na Defensor di Pueblo riba e forma den kual e ta ehersé su tareanan i prinsipalmente si tin reklamo riba sierto aspekto di su aktuashon tantu pa loke ta trata kontenido komo formal.
For di e promé petishon di Defensor di Pueblo algun aña pasa te ku awe Bestuurscollege no a instalá e komishon.

Den su relatonan anual ku e tin ku manda pa Konseho Insular Defensor di Pueblo a informá Konseho Insular na vários okashon ku e a proponé Bestuurscollege pa instalá e komishon pero sin resultado. Lo ta interesante pa pueblo haña sa di kon Konseho Insular no a laga Bestuurscollege responsabilisá su mes pa e hecho ku e no ta kumpliendo ku e petishon i pues tampoko ku lei?
E komishon por aportá na e manera ku Defensor di Pueblo ta hasi su trabou i asina por sostené e funshon di kòntròl di Konseho Insular.
Si e komishon tabata eksistí kaba e por a duna Defensor di Pueblo konseho riba su investigashonnan i nan resultadonan ku tantu a keda diskutí e último dianan aki i te hasta a kondusí na e ekspreshon di Bestuurscollege ku e no tin konfiansa mas den Defensor di Pueblo.
Nos por konstatá ku Bestuurscollege ni Konseho Insular a demonstrá e disponibilidat pa krea un kondishon ku por aportá na mehorashon di e relashon entre Bestuurscollege i Defensor di Pueblo siendo ku Defensor di Pueblo si e hasi esfuerso pa esaki. E a proponé pa instalá e komishon pero esaki no a haña oido.

Laga nos spera ku Konseho Insular ta tene kuenta ku e negligensia di nan parti i di parti di Bestuurscollege ora e fiha su opinion pa ku Defensor di Pueblo. Mi konseho ta pa lanta e komishon i, si ta nesesario ku ayudo di un asina yama “Commissie van goede diensten”, kuminsá traha riba mehorashon di e relashon di trabou entre Bestuurscollege i Defensor di Pueblo. Nos Defensor; Defensor di Pueblo di Kòrsou!

Etienne van der Horst
8 Yüni 2008