Konsepto final di Konstitushon di Kòrsou ta promové i fortifiká integridat di Gobièrnu?

Na Mart 2006 Gobièrnu Sentral i e Gobièrnunan Insular di Boneiru, Kòrsou, Saba, Sint Eustatius i Sint Maarten a yega na un akuerdo riba e konklushonnan final di un Kumbre tokante Struktura Estatal ku a tuma lugá na Sint Maarten. Un di e konklushonnan ta ku “Kòrsou lo realisá e rapòrt “Konfiansa” kompleto. Tur medidanan, tan leu ku esaki no a tuma lugá ainda, ta keda implementá konforme e proposishonnan menshoná den e raport pa asina evitá i kombatí korupshon”.

E rapòrt “Konfiansa” (Febrüari 1999) ta bisa entre otro:
“ku último tempu integridat gubernamental komo instrumento i kondishon pa e siudadano tin konfiansa den gobièrnu i pues pa kontinuashon di eksistensia di demokrasia, ta haña mas i mas atenshon den kuadro di bon gobernashon”.
“ku ta di esensial importansha ku e siudadano tin konfiansa den funshonamentu di gobièrnu. E konfiansa aki por wòrdu ganá òf mantené i reforsá únikamente si Gobièrnu (mandatario i ámtenar) su kalidat, impekabilidat, i koutela, i konsekuentemente su integridat, keda elevá riba tur duda”.
“ku mester duna prioridat na promové integridat polítiko i gubernamental. Integridat ta apsoluto. Sin integridat Gobièrnu no ta disfrutá di konfiansa di e siudadano”.
“ku e mandatarionan ta esnan ku ta tuma desishon i dirigí e aparato di ámtenar pero alabes ta fungi komo un ehèmpel pa tantu e ámtenar komo pa e siudadano”.
“ku e ámtenar òf mandatario ku ta hasi mal uso di su posishon por kousa un imágen di un organisashon gubernamental inkonfiabel, tantu interno komo eksterno. E funshon di ta un ehèmpel ta keda tachá”.
“ku pa integridat, un konteksto polítiko di eskala chikitu i konflikto di interes komersial ta un peliger real”.
“ku responsabilidat penal di mandatarionan tin ku keda ampliá konforme lei penal Hulandes. Tambe lo ta bon pa inkluí den esaki e posibilidat pa keda saká for di derecho di voto, en todo kaso e derecho di voto pasivo”.E último aki ta enserá ku un mandatario no por pone su mes eligibel mas durante un elekshon.

E konsepto final di nos Konstitushon resientemente a keda akseptá pa Bestuurscollege. Seguidamente Konseho Insular mester trat’é pa finalmente aprob’é. Artíkulonan 28 i 42 ta bisa ku un persona por ta respektivamente Minister òf miembro di Parlamentu basta ku, entre otro, e no a keda ekskluí for di derecho di voto. Artíkulo 41 insiso 2a ta stipulá ku ekskluí for di derecho di voto ta “e persona ku a keda sentensiá irevokablemente pa un kastigu di prison di por lo ménos 1 aña debí ku ela kometé un delito kual ta aparesé riba un lista aprobá pa medio di un ordenansa di Pais, i kual persona mes ora tambe a keda saká for di derecho di voto” .

Pues segun artíkulonan 28, 41 insiso 2a i 42 un Minister òf miembro di Parlamentu no por keda den funshon si ela keda kondená irevokablemente pa un kastigu di prison di por lo ménos 1 aña pa un delito ku ela kometé kual ta aparesé riba e lista aprobá pa lei i ku mes ora tambe ela keda saká for di derecho di voto. E no por partisipá tampoko na elekshonnan durante e periodo ku ela keda saká for di derecho di voto. E konsepto final di nos Konstitushon no ta brinda e posibilidat pa suspendé e Minister òf e miembro di Parlamentu turesten ku e kondena no ta irevokabel. Den kaso ku no ta saka e Minister òf e miembro di Parlamentu for di derecho di voto nan no mester retirá. Nan por sigui partisipá na elekshonnan no opstante e hecho ku nan a keda kondená irevokablemente pa un kastigu di prison di por lo ménos un 1 aña pa un delito ku nan a kometé kual ta aparesé riba e lista di delitonan aprobá pa lei.

Nos por puntra nos mes si Gobièrnu ta duna un bon señal ku artíkulonan 28, 41 insiso 2a i 42? Nan ta kuadra ku e espíritu di e konklushonnan i rekomendashonnan di e rapòrt “Konfiansa”? Mi ta invitá kada hende pa husga pa su mes.


Etienne van der Horst
12 Òktober 2008