A bira tempu pa introdusí un kódigo di kondukta pa nos mandatarionan

E rapòrt “Konfiansa” (1999) ku Teritorio Insular di Kòrsou a bai di akuerdo na Mart 2006 pa implementá su rekomendashonnan ta bisa ku ta deseabel pa riba tèrmino kòrtiku introdusí un kódigo di kondukta pa mandatarionan. E rapòrt ta sigui bisa ku konsiderando e karakter (mas) obligatorio ta preferá un kódigo di kondukta regulá den un lei. Ta rekomendá tambe pa un órgano polítikamente neutral manera Kontrolaria General di Antia kontrolá si mandatarionan ta tene nan mes na e kódigo di kondukta. Violashon di e kódigo di kondukta lo keda atendé den kuadro di esfera di lei penal manera e rapòrt ta indiká.

Den e reunion públiko di Konseho Insular den kual a trata entre otro Konstitushon di Kòrsou miembro di Konseho Insular sr. Godett a bisa ku e Plataforma di Konsulta tin miembronan ku tin manteka riba nan kabes sin ku ela supstansia e ekspreshon aki. Plataforma di Konsulta ta konsistí di personanan ku ta representá diferente gremio den nos komunidat i un ekspreshon manera esun di sr. Godett no ta kuadra ku e espíritu di e rapòrt “Konfiansa” i a kousa hopi disgustu den komunidat. E rapòrt hustamente ta kontené rekomendashonnan pa e siudadano rekobrá konfiansa bek den nos mandatarionan.

Un kódigo di kondukta por kontené entre otro un artíkulo ku ta stipulá ku un mandatario no ta ekspresá palabranan di insulto, kalumnia, mentira i personalmente ofensivo. E ekspreshon ku un persona tin manteka riba su kabes ta nifiká ku e persona tin kos pa tira na su kara òf e no ta inosente òf intachabel. Kada un persona por husga pa su mes si e ekspreshon di sr. Godett tabata na su lugá konsiderando ku e ta un miembro di e instituto ku ta representá nos komunidat. Den resien pasado ta tin miembronan di partidonan di oposishon ku tambe a ekspresá nan mes di tal manera ku esaki por wòrdu konsiderá komo ménos desente.

Pa introdusí un kódigo di kondukta nos no ta dependé di Gobièrnu Sentral ni nos tin ku warda pa nos Pais Kòrsou nobo bira un realidat. Nos por aktua awor basta e boluntat polítiko tei.


Etienne van der Horst
22 òktober 2008