Kon ta ku e kuentanan anual di Teritorio Insular di Kòrsou?

E siman aki ta planeá pa Komishon Sentral di Konseho Insular kuminsá ku e proseso di tratamentu di e konsepto di presupuesto pa 2008 ku Bestuurscollege a presentá pa aprobashon. Despues ku Komishon Sentral ta kla ku su trabou e tin ku disidí si e konsepto di presupuesto ta kla pa tratamentu den reunion públiko di Konseho Insular pa finalmente e keda aprobá òf rechasá.
Parti di e siklo di preparashon i aprobashon di un presupuesto ta kuentanan anual. Kada aña Bestuurscollege ta entregá un presupuesto den kua e ta presentá e maneho ku e ke bai hiba durante e aña benidero i tambe e fondonan ku e ta pidi aprobashon p’e pa ehekutá su maneho.
Despues ku aña kaba, segun lei di Komptabilidat, Bestuurscollege tin ku raportá na Konseho Insular kon e a hasi uso di e fondonan. Esaki ta sosodé pa medio di un kuenta anual. Konseho Insular tin ku aprobá e kuenta anual. A base di un kuenta anual Bestuurscollege i Konseho Insular por evaluá si a logra di ehekutá e maneho manera planeá i ku e fondonan disponibel. Tambe por evaluá si e fondonan a keda usá efektivo i segun reglanan vigente. Resultadonan di un evaluashon di un kuenta anual por ta motibu pa ahustá maneho òf pa atendé ku fondonan di e siguiente aña na un manera mas efektivo.
Promé ku un kuenta anual keda presentá na Konseho Insular pa aprobashon Bestuurscollege mester laga SOAB aprobá esaki pa despues Kontrolaria General kontrol’é riba efektividat i legalidat.

Kontrolaria General ta konstatá den su rapòrt “Rapport van Bedenkingen en Opmerkingen bij de jaarrekening 2000 van de Algemene Dienst van het Eilandgebied Curacao” ku a keda publiká 15 di desèmber 2006 ku e último kuenta anual ku a keda aprobá dor di Konseho Insular ta esun di 1988. Esaki ta enserá ku Konseho Insular tin un retraso di 18 aña inkluyendo aña 2006. E kuentanan anual te ku 2001 a keda entregá na Kontrolaria General pa aprobashon pero ningun di nan a keda aprobá debí na opheshonnan i remarkenan ku Kontrolaria General a trese dilanti pa loke ta trata e kontenido. Esaki ta algu ku komunidat no tin mag di akseptá. Un presupuesto di Teritorio Insular di Kòrsou ta trata ku sèn di komunidat i komunidat tin derecho di sa kon ta atendé ku su sèn i ku esaki a sosodé na un manera efektivo i segun lei i reglanan.

Un di e motibunan di kon Kontrolaria General no a aprobá e kuenta anual di 2000 ta falta di reglanan adekuá pa hiba un maneho finansiero i tambe presensia di un organisashon atministrativo i kòntròl interno ku no ta sufisiente pa brinda un base pa un bon maneho finansiero. Na e momento aki Gobièrnu di Kòrsou no tin kòntròl riba e situashon finansiero. Segun Kontrolaria General no ta sigur si e informashon finansiero ta korekto i kompleto i tambe t’asina ku no por garantisá efektividat i legalidat di gastunan hasí. Sin un bon maneho finansiero no ta posibel pa haña informashon ku ta nesesario pa hiba un bon gobernashon. Sin informashon konfiabel no ta posibel pa (re)dirigí gobernashon i responsabilisashon di e maneho hibá tampoko por ta konfiabel. Tambe Kontrolaria General ta konstatá ku no tin sufisiente konsientisashon i sentimentu di responsabilidat pa loke ta trata e proseso di preparashon di presupuesto, gobernashon ta dirigí mas riba tereno di operashon en bes di riba tereno di maneho i falta raportahe riba nivel di gobernashon i aparato gubernamental.

Un grupo di trabou ku yama “Werkgroep Algemene Financiele Positie (AFP)” a indiká ku e sistema di finansa mester ta di tal manera organisá ku informashon finansiero ta konfiabel, kompleto, kontrolabel i disponibel na tempu. E proseso pa yega na un sistema asina lo bai tuma hopi tempu i mester reforsá e funshon finansiero di Kòrsou. Tantu e kalidat komo e kantidat di e funshon finansiero no ta sufisiente pa por yega na un maneho finansiero responsabel. Tin un plan di akshon pero segun Kontrolaria General e diferente Bestuurscollegenan ku lo sigui otro mester komprometé nan mes pa ehekutá e plan aki sino lo no yega na e situashon rekerí. Un instrumento importante pa e plan di akshon, segun Kontrolaria General, ta e komishon di auditoría. E komishon aki ta un instrumento balioso pa indiká prioridat riba tereno di maneho finansiero i di kòntròl, pa duna “follow-up” na konsehonan i rekomendashonnan i pa monitor progreso di desaroyonan. Durante 2002, 2004 i 2005 e komishon aki a reuní 3 bia so.

Kontrolaria General a manda su rapòrt “Rapport van Bedenkingen en Opmerkingen bij de jaarrekening 2000 van de Algemene Dienst van het Eilandgebied Curacao” pa Bestuurscollege dia 13 di oktober 2006 ku e petishon pa den 2 luna di tempu, manera stipulá den lei, duna su komentario riba e konklushonnan i rekomendashonnan. Bestuurscollege no a hasi esaki. Den un karta fechá 6 desèmber 2006 Hefe di departamentu di Finansa di Teritorio Insular di Kòrsou ta informá Kontrolaria General ku e lo konsehá Bestuurscollege pa bai di akuerdo pa ofresé e rapòrt na Konseho Insular. Ta interesante pa sa si entretantu Konseho Insular a risibí e rapòrt i kiko ta bai ta e siguiente pasonan di Bestuurscollege i Konseho Insular. Rekomendabel ta pa invitá Kontrolaria General e siman aki pa bin duna Komishon Sentral di Konseho Insular un presentashon di e rapòrt pa asina nos gobernantenan tuma nota di e situashon aktual i rekomendashonnan ku a hasi pa yega na un situashon finansiero manehabel.

Diferente mandatario ta kritiká e supervishon finansiero ku ta preparando pa Kòrsou pero si nos tin ku kere Kontrolaria General nos ta leu for di manehá nos finansa nos mes na un manera responsabel. Komunidat tin ku eksigí di su gobernantenan ku nan ta hasi nan máksimo esfuerso i sigui e rekomendashonnan di Kontrolaria General pa finalmente den transkurso di tempu nos situashon finansiero bira manehabel pa nos mes i dor di nos mes.


Etienne van der Horst
28 òktober 2007