Bestuurscollege no ta tuma akshon riba e karta risibí di Gobièrnu Sentral tokante nombramentunan i Gobièrnu Sentral no ta bai hasi nada si Bestuurscollege no reakshoná?

Ta parse ku tin un kietut grandi rondoná di e nombramentunan ku a tuma lua na Teritorio Insular di Kòrsou entre yanüari i yüni 2007. Fin di Ougùstùs 2007 Gobièrnu Sentral a manda un karta pa Bestuurscollege tokante e nombramentunan aki i a informá Bestuurscollege ku for di konseho hurídiko ku e a risibí a bin resultá ku tin indikashon ku posiblemente – den algun kaso – tin nombramentunan ku a tuma lugá no konforme lei i/òf ku no ta na interes di pais. Gobièrnu Sentral a duna Bestuurscollege 2 siman di tempu pa koregí un ke otro i par reportá bek pa asina evitá ku den kuadro di alto supervishon mester Tuma medida (fuente: medionan di komunikashon 31 di ougùstùs 2007). Entretantu komunidat tin 8 siman sin tende algu tokante e asuntu aki i pues no ta konosí si Bestuurscollege a tuma akshon. Si ta asina ku na e momentu aki den medionan di komunikashon tin hopi atenshon pa akshonnan ku Bestuurscollege i otro entidatnan kompetente a tuma i ta tin intenshon di bai tuma den kuadro di 2 nombramentu ku a tuma lugá den e mes un periodo na 2 kompanianan anónimo di Gobièrnu, es ta Dòk i Selikor. Partidonan di koalishon NPA, Forsa Kòrsou i DP a pidi pa un reunion públiko di Konseho Insular pa puntra Bestuurscollege pa duna kuenta i rason tokante e nombramentu di un direktor na un di a kompanianan anónimo aki. Komunidat tin mag di karga speransa for di e akshonnan aki menshoná ku lo bai tuma akshon tambe den kuadro di e nombramentunan ku a tuma lugá na Teritorio Insular di Kòrsou? Pa un tempu hopi largu ta reina un kietut rondoná e nombramentunan aki i un persona por puntra su mes ta di kon Konseho Insular lo ke papia solamente riba nombramentu di un direktor serka un di e kompanianan anónimo di Gobièrnu i no tambe riba e nombramentunan ku a tuma lugá na Teritorio Insular di Kòrsou. Nos tur huntu tin ku lubidá e nombramentunan aki?

Artíkulo 2 di “Landsverordening Openbaarheid van Bestuur (LOB - P.B. 1995 no. 211)” ta bisa ku un órgano di gobernashon den su trabounan di ehekushon mester ta habri na públiko i duna informashon tokante esaki. E lei aki ta brinda kada siudadano e posibilidat pa puntra informashon tokante un asuntu di gobernashon ku ta dokumentá serka un órgano di gobernashon òf un departamentu, servisio òf instituto ku ta kai bou di e órganonan di gobernashon. E suministro di informashon ta obligá pa lei pero tin tambe kasonan di eksepshon i limitashon riba e obligashon aki.
A base di LOB un siudadano por aserka Gobièrnu Sentral i puntra pa risibí un kopia di e karta ku Gobièrnu Sentral a manda pa Bestuurscollege tokante e nombramentunan pa asina tuma nota di kiko eksaktamente a manda puntra Bestuurscollege. Un siudadano por puntra Bestuurscollege tambe un kopia di e karta ku Bestuurscollege a manda pa Gobièrnu Sentral komo reakshon riba e karta di Gobièrnu Sentral den kaso ku Bestuurscollege a reakshoná. Tambe por puntra Gobièrnu Sentral si por risibí un kopia di e konseho hurídiko ku a risibí tokante e nombramentunan.
Pero LOB ta stipulá tambe ku un órgano di gobernashon riba propio inisiativa ta duna informashon riba entre otro ehekushon di maneho. Lo ta na su lugá si tantu Gobièrnu Sentral komo Bestuurscollege den kuadro di transparensia riba propio inisiativa informá komunidat riba e akshonnan ku di un banda Bestuurscollege a tuma òf tin intenshon di tuma a base di e karta ku a risibí di Gobièrnu Sentral òf di otro banda, si Bestuurscollege no a tuma akshon ainda, kua akshon Gobièrnu Sentral a tuma òf tin intenshon di tuma a base di e hecho ku Bestuurscollege despues di mas ku 8 siman no a reakshoná ainda riba e karta di Gobièrnu Sentral. A base di lei komunidat tin derecho riba informashon i sigur si ta trata un asuntu kaminda tin indikashon ku posiblemente tin desishonnan di un órgano di gobernashon ku no ta konforme di lei i/òf ta perhudiká interes di pais. Ta trata aki posiblemente di gobernashon inkorekto.
Den kaso ku no ta bini transparensia den e akshonnan ku mester sigui ta keda e siudadano ningun otro opshon pa skohe e kaminda di aserka Gobernador di Antia Hulandes ku e petishon pa aserka e órganonan di gobernashon i puntra nan kon leu nan ta ku nan akshonnan ku nan a tuma despues ku e outoridat di mas haltu na Antia Hulandes na fin di yüni último a puntra Gezaghebber di Kòrsou pa manda tur dokumentonan relevante p’e relashoná ku e, tempu ei, último nombramentunan. Laga nos spera ku pa awor aki ainda no ta nesesario pa bini ku un medida di alto supervishon.


Etienne van der Horst
28 Òktober 2007