Bestuurscollege ta tarda di tuma akshon relashoná ku nombramentunan den servisio di Teritorio Insular di Kòrsou

Fin di ougùstùs 2007 Gobièrnu Sentral a manda un karta pa Bestuurscollege tokante e nombramentunan ku a tuma lugá na Teritorio Insular di Kòrsou durante e periodo yanüari te ku yüni 2007 i a informá Bestuurscollege ku for di konseho hurídiko ku e a risibí a bin resultá ku tin indikashon ku posiblemente – den algun kaso – tin nombramentunan ku a tuma lugá no konforme lei i/òf ku no ta na interes di pais. Gobièrnu Sentral a duna Bestuurscollege 2 siman di tempu pa koregí un ke otro i pa raportá bek pa asina evitá ku den kuadro di alto supervishon mester tuma medida (fuente: medionan di komunikashon 31 di ougùstùs 2007). Entretantu 8 siman a pasa sin ku komunidat a risibí informashon tokante lokual Bestuurscollege a hasi despues ku e a risibí e karta di Gobièrnu Sentral. Si ta asina ku durante e último 2 siman den medionan di komunikashon tabata tin hopi atenshon pa akshonnan ku Bestuurscollege i otro entidatnan kompetente a tuma i tin intenshon di bai tuma den kuadro di 2 nombramentu ku a tuma lugá den e mes un periodo na 2 kompanianan anónimo di Gobièrnu (Dòk i Selikor). Algun partido di oposishon (NPA, Forsa Kòrsou i DP) a pidi pa un reunion públiko di Konseho Insular pa puntra Bestuurscollege duna kuenta i rason tokante e nombramentu di un direktor na un di a kompanianan anónimo aki. Komunidat tin mag di karga speransa for di e akshonnan aki ku lo bai tuma akshon konkreto tambe den kuadro di e nombramentunan ku a tuma lugá na Teritorio Insular di Kòrsou? Nos por puntra nos mes ta di kon Konseho Insular lo ke papia solamente riba nombramentu di un direktor na un di e kompanianan anónimo di Gobièrnu i no tambe riba e nombramentunan ku a tuma lugá na Teritorio Insular di Kòrsou. Diferente partido di oposishon a ekspresá nan mes bastante kritiko riba e nombramentunan; Pueblo Soberano: “ta sensura tur nombramentu polítiko” (18 yüni 2007), Forsa Kòrsou: “revoká tur nombramentu ku ta kontra regla mes ora” (18 yüni 2007) i DP: “lo ta na su lugá si partidonan di koalishon mustra otro riba nan responsabilidat di gobernashon i revoká nombramentunan ku no a tuma lugá segun regla i normanan vigente” (14 ougùstùs 2007).

Nos por tuma nota ku direpente, awor ku oposishon a pidi pa tene un reunion públiko di Konseho Insular, Diputado di Asuntunan di Personal ta informá komunidat ku tin tardansa den e kontesta riba e karta di Gobièrnu Sentral. Motibu di e tardansa ta entre otro ku mester a buska konseho hurídiko promé. Diputado a bisa tambe ku pronto lo manda un karta di kontesta pa Gobièrnu Sentral i instalá un komishon ku lo bai evaluá e nombramentunan pero e no por a menshoná ki dia esaki lo bai tuma lugá (fuente: medio di komunikashon 27 di òktober 2007). Pa yega na un komishon no tin nodi di tuma hopi tempu. Tin un komishon instalá kaba for di 1999, “Commissie Indienstnemingen”, ku por hasi e trabounan di evaluashon basta nan apliká e kriterianan ku a keda stipulá dia a instalá e komishon i tambe e kriterianan ku Gobièrnu Sentral lo apliká den kaso ku e mester instalá un komishon su mes den kuadro di un medida di alto supervishon. E konseho hurídiko ku Gobièrnu Sentral a risibí lo mester ta basá riba kriterianan pa por a yega na e konklushon ku a yega na dje. Lo ta interesante pa komunidat sa kiko e kriterianan aki ta i tambe e kriterianan ku “Commissie Indienstnemingen” ta apliká.

Artíkulo 2 di “Landsverordening Openbaarheid van Bestuur (LOB - P.B. 1995 no. 211)” ta bisa ku un órgano di gobernashon mester ta habri na públiko den su trabounan di ehekushon i duna informashon tokante esaki. E lei aki ta brinda kada siudadano e posibilidat pa puntra informashon tokante un asuntu di gobernashon ku ta dokumentá serka un órgano di gobernashon òf un departamentu, servisio òf instituto ku ta kai bou di e órgano di gobernashon. Suministro di informashon ta obligá pa lei pero tin tambe kasonan di eksepshon i limitashon riba e obligashon aki (artíkulonan 11 i 12).
A base di LOB un siudadano por aserka Gobièrnu Sentral i puntra si e por risibí un kopia di e karta ku Gobièrnu Sentral a manda pa Bestuurscollege tokante e nombramentunan pa asina tuma nota di kiko eksaktamente a manda puntra Bestuurscollege. Por puntra Gobièrnu Sentral tambe un kopia di e konseho hurídiko ku e a risibí tokante e nombramentunan. Tambe por aserka Bestuurscollege pa risibí un kopia di e konseho hurídiko ku Bestuurscollege a manda pidi kua ta un di e motibunan pakiko Bestuurscollege ta tardando pa kontestá e karta di Gobièrnu Sentral.
Pero LOB ta stipulá tambe ku un órgano di gobernashon riba su propio inisiativa ta duna informashon riba entre otro ehekushon di maneho. Lo ta na su lugá si tantu Gobièrnu Sentral komo Bestuurscollege den kuadro di transparensia di gobernashon, riba nan propio inisiativa, informá komunidat regularmente tokante e akshonnan ku ta wòrdu tuma den kuadro di e nombramentunan. A base di lei komunidat tin derecho riba informashon i sigur si ta trata un asuntu kaminda tin indikashon ku posiblemente tin desishonnan di un órgano di gobernashon ku no ta konforme di lei i/òf ta perhudiká interes di pais.

Den kaso ku no ta bini transparensia den e akshonnan ku mester sigui ta keda e siudadano ningun otro opshon ku ta esun pa skohe e kaminda di aserka Gobernador di Antia Hulandes ku e petishon pa aserka e órganonan di gobernashon i puntra nan kon leu nan ta ku nan akshonnan i ki dia nan lo kaba di atendé e asuntu aki i raportá tokante e resultado di e trabounan inkluso eventual nombramentunan ku a keda revoká.
Laga nos spera ku pa awor aki ainda no ta nesesario pa bini ku un medida di alto supervishon.


Etienne van der Horst
28 Òktober 2007