Referèndem ta tokante nos dignidat òf algu otro?

Ya pa basta tempu kaba nos ta tende di oponentenan di e akuerdonan ku a yega na dje ku Hulanda durante e Toetsings-Ronde Tafel Conferentie dia 15 di Desèmber 2008, ku si akseptá e akuerdonan aki nos ta pèrdè nos dignidat. Hulanda lo haña muchu kòntròl i influensia i ta yama e status estatal nobo di Kòrsou un rekolonisashon dor di Hulanda.
Di unda di repente tur e prekupashon emoshonal aki pa nos dignidat a sali?

Pregunta ta si ta trata di dignidat ora nos komo komunidat ta tolerá:
(1) ku Kontrolaria General di Antia for di 1989 (20 aña largu!) ta konkluí pa kada kuenta anual di Teritorio Insular di Kòrsou ku e obligashonnan finansiero i gastu i entrada pa un parti grandi no a tuma lugá segun e presupuesto aprobá ni otro regulashonnan legal, ku e atministrashon finansiero no ta na òrdu ainda, ku e responsabilisashon finansiero no ta konforme instrukshonnan, ku e responsabilisashon no ta duna un bon bista di e maneho finansiero hibá i ku a hasi erornan relatá ku legalidat i konfiabilidat.
(2) ku, tan leu ku Kontrolaria General por a averiguá, e último kuenta anual ku a keda aprobá dor di Konseho Insular ta esun di 1989 (21 aña pasa!) i ku Bestuurscollege, no opstante petishonnan di parti di Kontrolaria General, no a duna komentario riba e konklushonnan i rekomendashonnan di Kontrolaria General i ku Konseho Insular no ta tuma akshon basá riba e kartanan di desaprobashon di Kontrolaria General.
(3) ku na 2008 Komishon Nombramentunan a konstatá ku ningun di e 539 nombramentunan ku a tuma lugá durante e periodo yanüari 2003 te ku yüni 2007 a tuma lugá konforme reglanan i proseduranan vigente i ku Bestuurscollege no ta informá komunidat si ela sigui e rekomendashonnan di e Komishon pa asina evitá ku nombramentunan ta sigui tuma lugá kontra reglanan i proseduranan vigente.
(4) ku Kontrolaria General tambe ta konkluí for di un investigashon di nombramentunan (2007) ku Bestuurscollege no ta tene su mes na su mes maneho i proseduranan lokual a resultá den gastunan inefisiente di personal.
(5) ku un (eks) Minister di Hustisia a para un investigashon di froude den kual su ruman hòmber tabata envolví (2003).
(6) ku un miembro di Konseho Insular den funshon a keda sentensiá ku kastigu di prison pa estafa, falsifikashon di dokumento i soborno i ku e a keda miembro di e representashon di pueblo, Konseho Insular, durante e periodo ku ela sinta su kastigu den prison (2006).
Asina por menshoná vários otro ehèmpel kaminda por hasi e pregunta si nos komunidat no por ta mas progresista ora ta trata di su dignidat.
Manera lo por resultá for di e 6 ehèmpelnan menshoná, e prekupashon pa ku nos dignidat lo por wòrdu mira lòs for di e manera ku ta duna kontenido na Kòrsou su futuro struktura estatal.

Un pregunta pa e “Grupo NO” ta si e por informá nos komunidat di kon e akuerdonan ku a yega na dje ku Hulanda riba tereno di Kòntròl Finansiero, Ministerio Públiko, Korte di Hustisia Komun, Mantenshon di Lei i Polis, sin ku ta drenta den asuntunan emoshonal manera dignidat di komunidat, mester keda rechasá? Esaki por kita atenshon for di informashon duná i no ta kontribuí na formulashon di punto di bista di e siudadano a base di informashon rashonal. Por t’asina ku “Grupo NO” no ke atendé e 6 ehèmpelnan menshoná òf e tin otro ideanan kual pa 20 aña largu nos no a kai ariba?

Un pregunta pa “Grupo SI” ta, kiko a kondusí na e akuerdonan ku Hulanda i pa kiko e siudadano lo mester akseptá e akuerdonan aki? Por fabor un splikashon sin ku ta drenta den e tópiko di saneamentu di debe pasobra esaki tambe por kita atenshon for di informashon duná riba e terenonan ya menshoná. Ta kada bia ta trese dilanti ku nunka mas Kòrsou lo haña un oportunidat asina. Ta parse ku saneamentu di debe ta sentral pero tin otro akuerdonan tambe ku ta rekerí un splikashon.


Etienne van der Horst
15 Mart 2009

www.nos-ke-sa.blogspot.com