Guia pa buska informashon dirigí pa yuda fiha un posishon pa Referèndem 2009


Na 2005 e mayoria di esnan ku tabata tin derecho di voto a skohe pa opshon A. Na inisio di referèndem 2005 a informá komunidat riba diferente tópiko pa kada opshon.
Kon a duna kontenido na Opshon A? Kiko ta konta ainda pa loke ta trata e informashon ku a duna komunidat?
Akibou ta sigui un bista riba e informashon ku a duna komunidat den kuadro di referèndem 2005. Pa kada tópiko ta hasi pregunta di lokual e kontestanan por wòrdu konsiderá komo un aporte na un siudadano pa e por fiha su posishon pa ku e pregunta ku e mester vota riba dje dia di referèndem 2009.


OPSHON A*
E opshon aki ta enserá, ku Kòrsou lo no forma parti mas di Antia Hulandes.
Kòrsou ta sigui forma parti di Reino Hulandes sí. Den Reino, Kòrsou ta haña
un status outónomo komo pais, ku ta komparabel ku Status Aparte di Aruba.


KONSEKWENSIANAN DI OPSHON A*
*(manera a keda publiká den e boletinnan di referèndem 2005)

1. E relashon entre islanan di Antia Hulandes
Kòrsou lo no forma parti mas di Antia Hulandes. Kòrsou por kumbiní ku un òf mas di e otro islanan sí, pa hasi sierto tarea huntu. Por kompará esei ku e aktual areglo di koperashon entre Antia Hulandes i Aruba. Kòrsou ta haña un nivel di gobernashon. Gobièrnu sentral (Land) ta disparsé i gobièrnu di Kòrsou ta keda enkargá ku e tareanan di gobièrnu sentral. Lo tin un parlamento i un gobièrnu e ora ei. E otro islanan no tin influensia mas riba komposishon di parlamento ni gobièrnu. Kòrsou ta haña tur kompetensia ku no ta kai bou di responsabilidat di Reino. Kòrsou ta disidí si por negoshá riba e kompetensianan ei.
a) Kua areglonan a/ta bai wòrdu adoptá ku e otro islanan pa ehekutá kua tareanan konhuntamente?
b) Pa kiko Kòrsou a disidí pa drenta e areglonan di koperashon spesífiko aki?
c) Kua outoridatnan ku no ta kai bou di Reino Kòrsou ta haña?
d) A negoshá riba e outoridatnan aki i si ta asina, tokante kua i kiko ta e resultado di esaki?
e) Pa kiko Kòrsou a disidí pa negoshá riba e outoridatnan spesífiko aki?


2. E relashon entre Kòrsou i Hulanda
Kòrsou ta bira partner direkto di Hulanda den Reino. Ta adaptá Statüt pa Kòrsou tambe haña status di pais outónomo den Reino. En prinsipio por kompará e status aki ku esun di Aruba, for di dia ku Aruba a haña Status Aparte na 1986.
Kòrsou mester kaba di fiha e kontenido eksakto di e status outónomo. Te kaminda ta rasonabel, Hulanda mester ehekutá esaki.
a) Kon Statüt a keda adaptá pa regulá e status outónomo den Reino?
b) E status outónomo di Kòrsou i Aruba ta diferensha for di otro i si ta asina, riba kua punto?
c) Di kon e puntonan aki ta diferensha for di otro?
d) Un status outónomo “en prinsipio komparabel ku e status aparte di Aruba” (mira aklarashon di Opshon A) ta mes kos ku un status outónomo “minimal igual ku e status aparte di Aruba” (mira e desishon di Konseho Insular di ratifikashon di e resultado di referèndem 2005)?
Por fabor duna un aklarashon riba esaki i si e palabrashonnan ku a yega na dje ku Hulanda ta representativo pa e “en prinsipio komparabel ku”.


3. Garantia di kalidat di gobernashon
Reino Hulandes ta garantisá derechonan humano i libertatnan fundamental, seguridat hurídiko i gobernashon adekuá. Esei ta stipulá den artíkulo 43 di Statüt.
Kòrsou mes ta sòru pa kumpli ku e derecho- i libertatnan aki. Kòrsou tin su mes Staatsregeling.
Reino Hulandes ta supervisá legislashon i gobernashon di Kòrsou tambe. E supervishon akí ta reglá den Statüt. Kambionan den karakter i alkanse di e supervishon akí, por tuma lugá solamente ku aprobashon di Kòrsou. Si Kòrsou no ta forma parti mas di Antia Hulandes, e supervishon di e pais Antia Hulandes ta kaduká.
a) Por fabor duna un aklarashon riba e konsepto di konstitushon ku a keda evaluá dor di e komishon di evaluashon di Konferensha di Mesa Rondó.
b) Kua kambionan den karakter i alkanse di e supervishon riba legislashon i gobernashon di Kòrsou a keda palabra ku pèrmit di Kòrsou? Por fabor duna un aklarashon riba esaki.


4. Nashonalidat
Habitantenan di Kòrsou ku tin nashonalidat Hulandes, ta keda ku e nashonalidat Hulandes. Nan ta keda ku e pasaporte Hulandes tambe. E lei di Reino ku ta regla ken ta Hulandes, ta keda vigente.
a) Esaki a keda mes kos?


5. Defensa i relashonnan eksterior
Defensa di teritorio di Kòrsou ta keda tarea di Reino.
Reino ta keda ademas ku e tarea di atendé relashonnan eksterior. Kòrsou por opta pa un akuerdo òf tratado internashonal konta pa Kòrsou tambe. Kòrsou mes por tuma inisiativa tambe pa akuerdonan ku lo konta pa Kòrsou so. Den diferente organisashon internashonal òf regional, Kòrsou por partisipá riba su mes. Kòrsou ta haña su mes espasio pa move riba tereno diplomátiko den region. Por pone yunan di Kòrsou na disposishon di gobièrnu di Reino, pa vigilá interesnan di Kòrsou na representashonnan di Reino manera na embahada i konsulado.
Meskos ku Aruba, Kòrsou ta asumí e obligashonnan Internashonal di Antia tambe, riba tereno di tratado, akuerdonan atministrativo i partisipashon den organisashonnan internashonal i regional. a) Kòrsou a determiná kaba ku e ke pa sierto akuerdonan i/òf tratadonan internashonal ta konta p’e tambe? Si esaki ta e kaso, kua ta esakinan i di kon esakinan? Si esaki no ta e kaso di kon no?


6. Belasting
Parlamento i gobièrnu di Kòrsou mes lo sòru pa leinan fiskal di Kòrsou. E servisio di belasting di Kòrsou mes lo imponé i kobra belasting. Tur entrada di belasting ta keda Kòrsou. E opshon aki no tin konsekuensia pa e leinan fiskal spesífiko ku ta forma base pa e sektor finansiero internashonal na Kòrsou. En prinsipio, areglonan internashonal i e areglo di belasting pa Reino (Belastingregeling voor het Koninkrijk, BRK), ku tambe ta importante pa kontinuashon di e sektor finansiero internashonal, ta keda eksistí.
a) Esaki a keda mes kos?


7. Komèrsio
Tráfiko di produkto, kapital i servisio lo topa ku sierto restrikshon. Esaki ta komparabel ku e restrikshonnan den komèrsio ku Aruba. Pa e tráfiko komersial entre e islanan lo mester paga derecho di importashon i eventual otro derechonan ekonómiko. Esei no ta e kaso awor. Lo mester di pèrmit di Banko Sentral pa tráfiko di kapital for di Kòrsou pa e otro islanan i lo mester paga komishon pa kambio di divisa. Esaki ta trese kuné ku gastunan di kapital lo subi den komèrsio ku e otro islanan.
Un status outónomo pa Kòrsou no ta ekskluí un union monetario i ekonómiko entre e islanan. Den e kaso ei e islanan mester koordiná nan maneho riba e terenonan aki ku otro.
a) Kòrsou a disidí pa yega na un union monetario entre e islanan? Si ta asina, di kon i kiko ta e kontenido di e union aki? Si no ta asina, di kon no?


8. Asuntunan monetario
Lo mester traha moneda i plaka di papel nobo di Kòrsou i pone nan den sirkulashon.
Na mes momentu lo saka e aktual moneda- i plakanan di papel Antiano for di sirkulashon. Mester bolbe yega na kombenio pa mara e moneda di Kòrsou na un otro moneda. Den e situashon aktual, ta parse realista pa mara e moneda di Kòrsou na dòler Merikano. En prinsipio, un posibel Banko Sentral propio di Kòrsou ta hiba supervishon monetario i supervishon riba maneho ekonómiko di institushonnan di krédito na Kòrsou so. E Lei di Supervishon di Institutonan Bankario i di Krédito ta aplikabel en prinsipio pa Kòrsou. Si e islanan forma un union monetario, e situashon aktual ku florin Antiano lo keda eksistí den forma adaptá.
a) A palabrá kaba na kua moneda e moneda di Kòrsou lo ta relatá? Si esaki ta e kaso, ta kua moneda esaki ta i di kon?


9. Tráfiko di persona
Yunan di Kòrsou lo no por biba i traha libremente na Boneiru i Islariba. Habitantenan di e islanan ei ku ke establesé na Kòrsou, ta kai bou di un areglo di atmishon.
Kòrsou, Boneiru i Islariba por sera un akuerdo di kooperashon, komparabel ku e Areglo di Kooperashon entre Antia Hulandes i Aruba. Un areglo asina lo por fasilitá e tráfiko di persona entre e islanan.
Tráfiko di persona entre Kòrsou i Aruba lo keda manera e ta. Meskos ta konta en prinsipio pa e tráfiko di persona entre Kòrsou i Hulanda. Gobièrnu di Kòrsou mes ta disidí tokante atmishon i ekspulshon di estranhero, inkluso Arubano, Boneriano, Islaribeño i Hulandes Europeo.
a) Kòrsou, Boneiru i Islanan Ariba a sera un akuerdo di koperashon pa loke ta trata un areglo di atmishon? Si ta asina, kiko ta e areglo? Si no ta asina, di kon no?
b) Kòrsou a disidí kaba tokante un areglo (nobo) di tráfiko di persona, inkluso Arubano, Boneriano, Islaribeño i Hulandes Europeo? Si ta asina, kiko ta e kontenido di e areglo? Si no ta asina, di kon no?


10. Hustisia
En prinsipio, nada no ta kambia den e organisashon hudisial. Korte Supremo, ku tin su sede na Den Haag, ta e kolegio hudisial mas haltu den Reino Hulandes. Por mantené e aktual Korte Komun di Hustisia di Antia Hulandes i Aruba pa tur e partinan di Reino den Karibe. Meskos ku Aruba, Kòrsou lo tin su mes Ministerio Públiko, ku su mes Prokurador General. Ministerio Públiko di Kòrsou mester duna kuenta i rason na gobièrnu di Kòrsou. Gobièrnu di Kòrsou ta disidí si antenshon di lei na Kòrsou lo bai forma parti di un kuadro mas amplio.
a) A disidí ku Korte Komun di Hustisia di Antia Hulandes i Aruba ta keda mantené pa tur e partinan di Reino den Karibe? Si ta asina, di kon? Si no ta asina, di kon no?
b) A disidí ku Kòrsou, mes kos ku ta e kaso pa Aruba, ta keda ku su mes Ministerio Públiko i ku su mes Prokurador General? Si ta asina, kon esaki ta reglá i di kon? Si no ta asina, di kon no i kiko ta e areglo?
c) A disidí ku mantenshon di lei na Kòrsou lo bai forma parti di un kuadro mas amplio? Si ta asina di kon a disidí esaki? Si esaki no ta e kaso, kiko a disidí anto i di kon? Por fabor duna un aklarashon riba esaki.


11. Benifisionan sosial
E benefisionan sosial di Kòrsou ta keda meskos ku nan ta. Komo pais outónomo den Reino, Kòrsou ta tuma e benefisionan ku awor ta kai bou di Antia Hulandes.
a) Esaki a keda mes kos?


12. Debe di gobièrnu
Komo pais outónomo den Reino, Kòrsou ta tuma un parti di e debe di pais Antia Hulandes. E parti di e debe ku keda na enkargo di Kòrsou, huntu ku e debe eksistente di Teritorio Insular di Kòrsou, lo bira e debe propio di pais Kòrsou.
a) Esaki a keda mes kos? Por fabor duna un aklarashon riba e akuerdo di saneamentu di debe.
b) Di kon a yega na un akuerdo ku Hulanda pa saneamentu di debe?


13. E relashon ku union Europeo
E posibel konsekuensianan pa e relashon ku Union Europeo no ta determiná ainda. Dependiendo di e posishon di Union Europeo, gobièrnu di Kòrsou mes por skohe pa kontinuá e aktual status di Paisnan i Teritorionan di Ultramar (LGO) òf pa haña e status di Teritorio Ultra-Perifériko (UPG). Si skohe e status di UPG, esei ke men un integrashon den Union Europeo. Tal integrashon lo tin konsekuensia tambe pa otro temanan ku ta trata den e boletin aki. Spesialmente pa komèrsio, asuntunan monetario i e défisit riba presupuesto, otro kondishonnan lo konta si Kòrsou skohe pa un status di UPG.
a) Entretantu ta konosí kiko e posishon di Union Europeo ta pa ku e status di Kòrsou den kuadro di e relashon ku Union Europeo; sea un status di Paisnan i Teritorionan di Ultramar (LGO) òf un status di teritorio Ultra-Periferiko (UPG)? Si ta asina, kiko ta e preferensia di Union Europeo i kiko Kòrsou su posishon ta pa ku esaki?


14. E derecho di outodeterminashon
E derecho di outodeterminashon ta keda konservá. E opshon aki ke men kontinuashon di e status di pais asosiá segun reglanan di Statüt. Den futuro e posibilidat ta keda eksistí pa skohe un otro relashon estatal ku Hulanda a base di e derecho di outodeterminashon.
a) Esaki a keda mes kos?



Etienne van der Horst
27 Mart 2009