Kon ta sigui ku nombramentunan na Teritorio Insular di Kòrsou? Lo bin kambio òf ta sigui riba e mesun kaminda?

Na Yüli último Diputado sra. Leito a anunsiá den medionan di komunikashon ku Bestuurscollege a risibí un promé rapòrt di e komishon nombramentunan presidí pa SOAB den kual a konstatá ku ningun di e 539 nombramentunan ku a tuma lugá na Teritorio Insular di Kòrsou durante e periodo Yanüari 2003 te ku Yüni 2007 a bai segun reglanan i proseduranan vigente. Segun Diputado Leito esaki ta un motibu pa prekupashon i Bestuurscollege mester siña for di esaki. Un di e rekomendashonnan di e komishon ta pa simplifiká e reglanan. Diputado Leito a informá ku Bestuurscollege a kuminsá di apliká un lista simplifiká di kriterionan ku mester kumpli kuné ora nombra hende den servisio di Gobièrnu. No ta konosí kiko Bestuurscollege a hasi òf ta bai hasi ku e otro rekomendashonnan. Tambe Diputado Leito a menshoná ku Bestuurscollege lo bai risibí un di dos rapòrt di e komishon den kual ta trata sierto nombramentu spesífiko. No ta konosí si entretantu Bestuurscollege a risibí e rapòrt aki i kiko a hasi òf ta bai hasi ku e rekomendashonnan ku e komishon a hasi den e di dos rapòrt aki.

Kontrolaria General tambe a konstatá den su rapòrt “Rapport bevattende de uitkomsten van het onderzoek indienstneming en salarisbetaling personeel van het Eilandgebied Curacao” di yuni 2007 ku Bestuurscollege no ta sigui su mes proseduranan i reglanan ora nombra hende den servisio di Gobièrnu. Komunidat tin mag di konkluí awor ku e diferente Bestuurscollegenan ku a sigui otro durante e periodo di Yanüari 2003 te ku Yüni 2007 no a apliká prinsipionan di bon gobernashon en todo kaso no riba e tereno di maneho di personal. Un di e prinsipionan di bon gobernashon ta e asina yama “prinsipio di koutela” (“zorgvuldigheidsbeginsel”). Esaki ta enserá ku Bestuurscollege mester prepará i tuma un desishon ku e koutela nesesario: mester trata e siudadano/ámtenar korekto, hasi investigashon kouteloso di e echonan i interesnan, sigui proseduranan i tuma desishonnan korekto i sólido. Un otro prinsipio di bon gobernashon ta esun di motivashon. Bestuurscollege mester motivá su desishonnan bon. E echonan mester ta korekto i e motivashon mester ta lógiko i komprendibel.

Awor kiko Bestuurscollege ta bai hasi konkretamente pa evitá ku lo sigui riba e mes un kaminda di mal gobernashon pa loke ta trata nombramentunan? Bon gobernashon tambe ta enserá transparensha. Komunidat, i sigur e kuerpo di ámtenar, tin derecho di sa kiko e maneho di nombramentu ta bai ta awor ku a keda konfirmá di nobo ku e diferente Bestuurscollegenan no a sigui proseduranan i reglanan.

Entretantu e Bestuurscollege aktual a nombra un Hefe Suplente di servisio na DROV sin ku ta tin konsehonan di e Hefe di servisio i di e Departamentu di Asuntunan di Personal di Gobièrnu. Te ku promé ku e nombramentu aki ta tin 2 empleado na DROV ku a base di turno tabata remplasá e Hefe di servisio durante su ousensia. No ta konosí si tin un prosedura spesífiko ku mester sigui pa nombra un Hefe Suplente di servisio pero e rapòrt di Kontrolaria General ta menshoná ku den e prosedura pa tomo di desishon di Bestuurscollege tokante asuntunan di personal e Departamentu di Asuntunan di Personal mester duna un konseho. Esaki no a tuma lugá den e kaso aki i a nombra un Hefe Suplente durante vakashon di e Hefe di servisio. Mi ke enfatisá ku mi komentario ta dirigí riba e prosedura ku (no) a sigui den e kaso di e nombramentu aki i no riba e 2 empleadonan konserní.

Nos por bisa ku ta 539 + 1 = 540 kaso di nombramentu a tuma lugá no konforme proseduranan. Bèrdat un motibu di prekupashon, manera Diputado Leito a bisa na Yüli último. Te kuantu nos ta sigui konta?


Etienne van der Horst
7 sèptèmber 2008