E funshon di Ombudsman tei pa sostené e proseso di desaroyo di bon gobernashon.

Ku hopi asombro mi a tuma nota den medionan di komunikashon di e e-mail di diputado sra. Marilyn Alcala-Walle fechá 27 di Mei 2008 dirigí na Ombudsman sr. Fred Wiel. Den e e-mail e ta bisa ku na su opinion Ombudsman ta rekreá su mes ku karta ku e ta manda pa entre otro Bestuurscollege. Tambe diputado Alcala-Walle ta bisa ku e ta haña ta un lástima enorme ku kada bes e ta risibí tipo di informashonnan asin’aki ku ta hou e op, strob'e di sirbi komunidat i ku no ta sirbi komunidat i ningun propósito. E ta puntra su mes si ta nada Ombudsman no tin di hasi. E ta bisa pa no manda korespondensia di ridikules estilo Jan Joker p’e. Tambe e ta bisa ku e tin sufisiente trabou di hasi pa komunidat en bes di lesa ridikules.
Ami no por imaginámi ku diputado Alcala-Walle por a skibi un mail asin’aki.

Ombudsman ta outorisá pa medio di lei pa riba su mes inisiativa òf a base di kehonan ku e ta risibí investigá si Gobièrnu den sierto kaso a aktua manera debe ser. A base di e resultadonan di e investigashon e por duna su opinion i/o rekomendashon. Segun lei e meta di esaki ta pa kontrolá i stimulá bon kalidat di gobernashon. E tin tambe e outoridat pa investigá komportashon di entre otro Konseho Insular, Bestuurscollege i Gezaghebber.
Mi ta na haltura ku Ombudsman a yega di manda karta pa Bestuurscollege puntrando kon ta pará ku e kuentanan anual di Teritorio Insular di Kòrsou ku pa lei mester keda entrega i aprobá promé ku sierto fecha lokual no tabata tumando lugá. Tambe Ombudsman a yega di manda karta puntrando Bestuurscollege informashon tokante e nombramentunan di hendenan den servisio di gobièrnu kontra di regla i prosedura. Te awe komunidat no a tende kiko e resultado ta di e komishon ku a lanta aña pasa bou di presidensia di SOAB pa investigá e nombramentunan aki.

Sra. Alcala-Walle ke men ku e kartanan tokante e dos tópikonan aki ta rekreashon di Ombudsman? Ta korespondensia di Jan Joker esakinan ta? Diputado Alcala-Walle no ta interesá den e tipo di kartanan aki i ke pa Ombudsman stòp ku esaki? Pueblo tin derecho pa aserka Ombudsman tokante diferente tópiko i tin derecho pa risibí informashon i klaridat riba na preguntanan, prekupashonnan i kehonan. Esnan ku Ombudsman ta aserka pa informashon, entre otro Bestuurscollege, pa lei tin e obligashon pa reakshoná dentro di un sierto kantidat di tempu definí.
By the way; kon a para ku e kuentanan anual? Bestuurscollege i Konseho Insular tin retraso ainda den tratamentu di e kuentanan anual? Tin klaridat kaba tokante e nombramentunan i kon ta sigui ku e fenómeno aki? Tin un maneho pa evitá ku nombramentunan ta sali for di man manera tabata e kaso durante años?

Mi tin un konseho pa diputado Alcala-Walle i Bestuurscollege. Lanta e komishon menshoná den artíkulo 8 di Eilandsveordening Ombudsfunctionaris Curacao. E komishon tin komo tarea entre otro pa, riba petishon òf riba su mes inisiativa, duna konseho na Ombudsman riba e forma den kual Ombudsman ta ehersé su tareanan i tambe si tin reklamo riba sierto aspekto di aktuashon di e outoridat aki tantu pa loke ta trata kontenido komo formalidat. E e-mail ku e agreshon verbal no tabata na nodi.
Pa Ombudsman mi tin e mesun konseho. Aserka Bestuurscollege ku e petishon pa lanta e komishon menshoná mas lihé ku ta posibel pa asina e por analisá e opservashonnan di diputado Alcala-Walle i duna konseho na Ombudsman. Na mi opinion e keho entregá dor di Ombudsman na Ministerio Públiko kontra di diputado Alcala-Walle tampoko no tabata na nodi. Ban lanta e komishon!

Etienne van der Horst
31 Mei 2008