Ken mester tene responsabel pa e mas o ménos Naf. 132,000 ku Selikor a paga sr. Asjes awor ku korte a destruí e desishonnan di su nombramentu i di su kontrato di trabou?

Korte a destruí e desishon di StIP pa apuntá sr. Asjes komo e di dos direktor na Selikor i tambe e desishon pa firma su kontrato di trabou. Pa e nombramentu polítiko aki Selikor mester a paga mas o ménos Naf. 132.000 na sr. Asjes. Korte a bisa ku StIP den e kaso di nombramentu di sr. Asjes a aktua den violashon ku rason i ekidat (redelijkheid en billijkheid) kual dos aspekto ta ser rekerí pa konsiderá na interes di Selikor. Segun korte, firmando e kontrato di trabou ku sr. Asjes un (1) dia promé ku korte a dikta sentensia den e kaso di su nombramentu, a pone Selikor den un situashon finansiero indeseabel ku konsekuensianan, te ainda, konsiderabel. Probablemente korte a bisa “te ainda” pasobra tin kaminda pa kana pa eliminá/kompensá e konsekuensianan finansiero pa Selikor. E aktual hunta di komisario tin un deber pa konsiderá esaki debidamente pa asina na promé lugá Selikor keda kompensá i na di dos lugá duna un aporte na eliminashon di práktikanan di mal gobernashon na Kòrsou.

Un promé análisis ta mustra ku e aktual hunta di komisario di Selikor por sigui 2 senario:
1) E por tene StIP responsabel pa e gastunan i kuminsá un kaso den korte pa haña esaki kompensá pa despues riba su turno e aktual direktiva di StIP, a base di Kódigo Sivil Buki 2, tene e eks-miembronan di direktiva di StIP ku e tempu ei a bai di akuerdo ku nombramentu di sr. Asjes personalmente responsabel pa e gastunan di e kompensashon.
2) E por tene e eks-miembronan di e hunta di komisario di Selikor, ku e tempu ei a bai di akuerdo pa ehekutá e nombramentu dor di StIP un (1) dia promé ku e sentensia a kai den korte, personalmente responsabel pa e gastunan di kompensashon.

Den kaso di tur dos senario nos mester wak si e partidonan di koalishon PAR i PNP tin e kurashi polítiko pa sigui un di nan pa asina atvertí tur miembro di direktivanan di fundashonnan di gobièrnu i tur komisario di NV-nan di gobièrnu ku mal gobernashon di nan parti den e entidatnan aki inevitablemente lo tin su konsekuensianan personal.
Probablemente nos polítikonan lo bai wak promé si por eksigí e sèn bek for di sr. Asjes. Asina ta evitá posibel frikshon den koalishon komo ku un di e partnernan den koalishon, ku ta partido FOL, a hunga e ròl prinsipal den e nombramentu di sr. Asjes. En todo kaso mester aktua pasobra mester kompensá e gastunan di Selikor ku e lo no a hañ’é konfrontá kuné si a apliká bon gobernashon i ta bin aserka ku ta trata di sèn di pueblo.

Si nos mandatarionan mes no tin e kurashi polítiko pa aktua tin un otro opshon ku por keda inisiá pa e empleadonan di Selikor, konsiderando ku nan ta interesadonan, sostené pa nan sindikato ABVO. Nan lo por skohe pa un di e 2 senarionan menshoná ariba pa asina Selikor por haña su gastunan di mas o ménos Naf. 132.000 kompensá. Kon ku bai bin e sèn aki lo por a wòrdu usa pa entre otro entrenamentu di empleado òf kompra di fasilidatnan di trabou òf otro aspektonan operashonal ku empleadonan ta benefisiá di dje.

Tantu Selikor i e empleadonan ku a kuminsá e kaso kontra di StIP i hunta di komisario di Selikor ta tin gastu di abogado pa kual nan por konsiderá pa tene e miembronan di direktiva di StIP òf miembronan di hunta di komisario ku a koperá ku e nombramentu i ehekushon di esaki personalmente responsabel.

E kaso di nombramentu di sr. Asjes por haña un otro rabu tambe si sr. Asjes disidí di eksigí pago di daño i perhuisio, sea via e kaminda di korte òf via e kaminda di negoshashon. Si resultá ku tin ku paga sr. Asjes daño i perhuisio por konsiderá pa tene e miembronan di direktiva di StIP i e miembronan di hunta di komisario personalmente responsabel pa kompensá e gastu aki tambe. Sinembargo no mester ekskluí ku e chèns ku sr. Asjes ta haña rason ta limitá komo ku e tampoko a aktua di buena fe ora e a firma e kontrato di trabou sabiendo ku e siguiente dia korte lo dikta sentensia.

By the way: sr Cooper, protagonista prinsipal den e nombramentu polítiko di sr. Schotte na DROV, ta dispuesto pa kubri e gastunan di abogado di e empleado di DROV ku segun e veredikto preliminar ta parse ku finalmente lo bai gana e kaso kontra di Gobièrnu Insular? Si e nombramentu aki lo no a tuma lugá e empleado lo no a hañ’é konfrontá ku e gastunan aki. Kisas sr. Cooper por puntra e diputadonan ku a sostené e tempu ei den e nombramentu di sr. Schotte pa kontribuí na kubri e gastunan. Kon ku bai bin e desishon di e nombramentu polítiko aki a keda tuma dor di Bestuurscollege kolektivamente.


Etienne van der Horst
17 Febrüari 2008