Komishon pa investigá nombramentunan tin 2 siman mas pa terminá su trabou

Riba 19 di òktober 2007 Bestuurscollege a disidí pa instalá un komishon ku mester investigá e nombramentunan ku a tuma lugá na Gobièrnu Insular durante e periodo yanüari 2003 te ku yüni 2007. Segun e desishon e komishon mester hasi su trabou den 8 siman ku e prioridat di mas haltu. Esaki ta enserá ku e trabou mester ta kla riba 14 di desèmber 2007. Ya kaba 6 siman a pasa i falta 2 siman mas pa finalisá e trabou. E desishon ta enserá tambe ku e komishon tin ku raportá semanalmente na Bestuurscollege via diputado di asuntunan general. Lo ta bon pa Bestuurscollege, durante su próksimo rueda di prensa, duna komunidat un relato breve di e trabounan hasí dor di e komishon te na e momentu aki. Tambe lo ta bon pa informá komunidat si e komishon lo keda kla ku su trabou dentro di 8 siman manera Bestuurscollege a disidí.

Komo ku Gobièrnu Sentral a informá Bestuurscollege ku segun konseho hurídiko tin indikashonnan ku posiblemente tin nombramentunan ku a tuma lugá no konforme leinan vigente i/o ku no ta na interes di pais lo ta interesante pa wak si e komishon tambe ta identifiká e indikashonnan aki. Lo ta bon pa e komishon konsultá ku e entidat ku a duna Gobièrnu Sentral konseho hurídiko pa haña klaridat riba e indikashonnan.
Un di e otro tareanan di e komishon ta pa fórmula proposishonnan pa Bestuurscollege kon pa atendé e nombramentunan ku, na opinion di e komishon, no a tuma lugá teniendo sufisientemente kuenta ku reglanan i proseduranan vigente i eksigensianan di kalidat pa loke ta trata rekrutashon, selekshon, tumamentu den servisio, nombramentu i renumerashon.

Si resultá ku tin kosnan ku a tuma lugá na un manera inkorekto ta di spera ku Bestuurscollege tin e kurashi polítiko pa aktua i si tin ku revoká desishonnan, pa hasi esaki tambe. Tambe ta di spera ku partidonan di oposishon lo denunsia e nombramentunan aki ku e mes un fervor ku nan a denunsia e hecho ku segun nan e presupuesto 2008 no ta konforme lei i reglanan vigente.
Kon ku bai bin ta un kos so por hasi ku desishonnan ku no a tuma lugá segun lei i/o ku no ta na interes di pais; revoká nan.


Etienne van der Horst
4 desèmber 2007