Komishon Nombramentunan ta kumpli òf no ta kumpli ku e enkargo di Bestuurscollege?

E Komishon Nombramentunan na Teritorio Insular di Kòrsou no ta kumpli ku e enkargo di Bestuurscollege. E Komishon no a logra di presentá su konklushonnan i rekomendashonnan na Bestuurscollege dentro di e tèrmino stipulá pa Bestuurscollege. E Komishon ta mas ku 3 luna lat. Ta esaki tabata e intenshon di Bestuurscollege?
Manera en general ta konosí mayoria bia ora Gobièrnu instalá un komishon ta pa motibu ku e ke evitá ku un asuntu ta keda solushoná riba tèrmino kòrtiku pasobra esaki no ta kumbiní Gobièrnu pa un òf otro motibu. E Komishon Nombramentunan bou di presidensia di SOAB a faya. For di prinsipio e Komishon mester a notifiká Bestuurscollege ku e no por kumpli ku e enkargo dentro di e tèrmino stipulá. E termino a keda prolongá un bia i entretantu e prolongashon aki tambe a vense. Seguidamente no mester ekskluí ku a base di e promé raportahe di e Komishon, Bestuurscollege por pidi pa informashon adishonal i asina alargá e tèrmino den kual e Komishon lo presentá su konklushonnan i rekomendashonnan final. Entretantu algun kaso den korte ta konfirmá e karakter (polítiko) di diferente nombramentu.

SOAB sea alerta pa boso no ta keda posiblemente usa dor di polítika pa sirbi sierto agènda (polítiko) (sutilmente) palabrá de antemano.
Henter e manera ku te ku awor aki a atendé e asuntu di nombramentunan na Teritorio Insular di Kòrsou, na mi opinion, ta ilustrá un falta di rèspèt pa Gobernador i Promé Minister di Antia Hulandes ku a mustra nan prekupashon tokante e nombramentunan ku a tuma lugá den e periodo di yanüari te ku yüni 2007. Bestuurscollege sinembargo a disidí pa laga investigá tur e nombramentunan ku a tuma lugá for di 2003 ku ta un periodo mas largu ku e promé mitar di 2007 lokual ta enserá muchu mas trabou pa e Komishon. Esaki ta demonstrá e intenshon pa alargá e tèrmino di e enkargo ku kisas hustamente ta e intenshon di Bestuurscollege. Den e sentido aki e Komishon ta kumpli ku e “enkargo” di Bestuurscollege.

Ki dia por fin komunidat di Kòrsou, Promé Minister i Gobernador di Antia Hulandes ta haña un relato di e konklushonnan i rekomendashonnan di e Komishon Nombramentunan i e pasonan konkreto ku Bestuurscollege a tuma pa eliminá nombramentunan polítiko kontra di tur regla i prosedura?

Etienne van der Horst
19 Mart 2008