Kon ta sigui ku e nombramentunan den servisio di gobièrnu fuera di prosedura i regla?

Despues di basta komentario relatá ku e asina yamá nombramentunan polítiko di entre otro sekretarianan i kolaboradornan di diputadonan den servisio di gobièrnu insular ku a keda bosiberá di parti di diferente gremionan den nos komunidat i tambe e empleadonan di DROV, nos por a tuma nota den medionan di komunikashon ku Gobernador di Antia a manda puntra Bestuurscollege un lista di tur nombramentunan entre yanüari i yüni 2007 na servisionan di gobièrnu insular inkluso kompanianan di gobièrnu insular kompaña pa e konsehonan finansiero i hurídiko di e servisionan gubernamental relevante. Gobernador a pidi pa e por risibí e informashonnan aki promé ku 7 di yüli 2007.
Tambe nos por a tuma nota ku partidonan di koalishon riba 30 di yüni 2007 a disidí ku lo instalá un komishon ku lo bai analisá tur e nombramentunan ariba menshoná pa wak si nan a bai segun proseduranan i reglanan establesé. E komishon lo bai eksistí di representantenan di servisio di personal, servisio di finansa i servisio hurídiko di teritorio insular.

Ta bon pa komunidat keda poné na haltura kiko e progreso di e trayektonan aki ta pa asina Bestuurscollege ta transparente den kuadro di bon gobernashon ya ku ta tin tantísimo komentario riba e manera entre otro no-transparente ku e nombramentunan a tuma lugá.
Nos lo ke sa si Bestuurscollege a manda e informashon ku Gobernador a pidi pe pa Gobernador kaba. Ya 1 siman a pasa despues ku e fecha di e deadline ku Gobernador a duna Bestuurscollege.
Nos ke sa tambe si e komishon menshoná a keda instalá kaba i kiko su tarea ta bai ta eksaktamente i dentro di kuantu siman e mester finalisá su trabou i presentá e resultadonan na Bestuurscollege? Nos sa ku hopi bia e strategia di instalá un komishon ta pa laga e asuntu drenta den doofpot i ora puntra kon ta para ku e investigashon ta haña komo kontesta ku komishon ta bezig ainda te dia tur hende lubidá ku ta tin un komishon.
Prensa a hasi un tremendo trabou di trese e asuntu di nombramentunan fuera di prosedura e regla den publisidat i nos ta spera ku lo sigui ku e bon trabou aki di watchdog na interes general i sigui monitor si Bestuurscollege ta kumpli ku lokual ta palabrá.

Dia 18 di yüni nos por a tuma nota den korant ku e partidonan Forsa Kòrsou i Pueblo Soberano a laga sa ku nan tambe ta kontra di e nombramentunan ku no a tuma lugá segun prosedura i regla. Partido Forsa Kòrsou a te hasta proponé pa revoká tur nombramentu ku ta kontra di regla mes ora. Partido Pueblo Soberano, manera ta bisa den korant, a laga sa ku nan lo bini ku un proposishon pa evitá tipo di nombramentu asina den futuro.
Awor tur dos e partidonan aki tin representashon den Konseho Insular pues nan lo por bini ku inisiativanan pa atendé e nombramentunan ku a tuma lugá último lunanan tantu diskutí den publisidat i perkurá pa Bestuurscollege ta sigui su mes proseduranan i reglanan pa ku maneho di personal. Kon ku bai bin ta Konseho Insular ta e órgano ku tin ku kontrolá Bestuurscollege su trabou i ta na Konseho Insular Bestuurscollege tin ku aportá i duna kuenta i rason.

Kontrolaria General den su rapòrt tokante nombramentu di hende den servisio di gobièrnu i pago di salario, ku a keda presentá luna pasa, ta konstatá entre otro ku durante e periodo 2003 – 2006 e diferente bestuurscollegenan na turno riba un base regular no a sigui prosedura i regla ora nombra hende den servisio i no a motivá esaki sufisiente. No ta un eksepshon ku despues di e nombramentu ku no a bai segun prosedura i regla ta informá e servisio na kual e persona a keda nombra. Den kaso di nombramentu di sekretaria i kolaboradónan di diputadonan den servisio di gobièrnu aparte di ku no a sigui prosedura pero mayoria bia nan no ta kumpli ku e eksigensianan di e funshon den kual nan a keda nombra. Kontrolaria General ta bisa ku e manera di proseder aki, sin konsultá, ta frustrante pa e hefenan i personal di e servisio kaminda e sekretarianan i kolaboradónan ta keda nombra. Nos ta kere ku lo ta bon pa hefenan i personal di servisionan di gobièrnu sali dilanti i denunsia e nombramentunan aki ku a tuma lugá último periodo na nan servisio meskos ku DWI, GGD, Milieudienst i DROV a hasi. Un otro frustrashon ta ku e sekretarianan i kolaboradónan ta risibí un salario mas haltu pa motibu ku Bestuurscollege a disidí na 2003 ku nan ta risibí un oumento di entrada. Durante e periodo ku nan ta pone na disposishon di diputado nan ta risibí un toelage di 25% di nan salario i ora nan drenta aparato públiko (bek) nan ta risibí un oumento di asina yama 3 trede den e schaal ku nan ta aden òf un oumento di salario di mínimo Naf. 250,-. Segun Kontrolaria General esaki a kondusí na uso inefektivo di fondonan di gobièrnu ku por a keda evitá.

Kontrolaria General ta di opinion ku Bestuurscollege den kuadro di bon gobernashon mester duna un bon ehèmpel dor di kumpli ku prosedura i regla. Den kaso ku Bestuurscollege ta di opinion ku mester kita for di prosedura i regla, bon gobernashon ta eksigí ku mester hasi esaki transparente lokual no ta sosodé na e momento aki. Segun Kontrolaria General e tono na tòp, es ta nos gobernantenan, ta un faktor ku ta promové legitimidat i efektividat di aparato públiko ku nos mester keda balotá.

Kontrolaria General ta rekomendá ku mester mehorá e disiplina di Bestuurscollege pa tene su mes na su mes maneho, proseduranan i reglanan. Na nos opinion Konseho Insular tin un ròl importante den esaki. Konseho Insular por puntra Bestuurscollege pa bin duna kuenta i rason pa e lokual Kontrolaria General a konstatá den nan rapòrt “Onderzoek naar de indienstnemingen en salarisbetalingen personeel van het Eilandgebied Curaçao”. Kontrolaria General a manda e rapòrt aki pa Konseho Insular riba 21 di yüni 2007 despues ku Bestuurscollege a risibí e mesun rapòrt aki na 19 di aprel 2007 pa dentro di un periodo di 2 luna duna su komentario riba e kontenido i no a reakshoná.
Nos ta spera ku Konseho Insular ta asumí su responsabilidat pa ku pueblo i lo aktua debidamente. Nos lo keda monitor esaki i nada tokante e nombramentunan lo drenta doofpot.

Nos a tuma nota tambe den korant ku Sr. Schotte a laga sa ku e ta dispuesto na no akseptá su nombramentu na DROV si drai bek tur nombramentunan di sekretarianan i kolaboradónan di último 10 aña. Na promé lugá mi ta kontentu ku sr. Schotte ta konsiderando pa no akseptá e nombramentu. Lo tin un motibu ku e ta hasi esaki. Bestuurscollege tambe den un karta pa personal di DROV a trese dilanti ku e no tin opheshon pa den konsulta ku sr. Schotte buska un otro passende functie p’e den DROV. Mi por konkluí for di esaki ku tantu Bestuurscollege komo sr. Schotte ta sinti ku algu no a bai bon den e proseso di nombramentu.
Nos lo keda vigilá henter a asuntu di nombramentunan fuera di prosedura i regla i e kaso den korte di parti di ABVO ku ta pendiente.


Etienne van der Horst, 15 yüli 2007

-------------------------------------------------------------------------------------------------
www.gov.an/arna rapòrt bou di Curaçao: “op 21 juni 2007 gepubliceerd rapport bevattende de uitkomsten van het onderzoek indienstneming en salarisbetaling van het personeel van het eilandgebied curacao”.